Qazaqstanda túsirilgen serıaldar AQSh, Pýerto-Rıko, Kanada, Latyn Amerıkasynda kórsetiledi

NUR-SULTAN. QazAqparat - «Qazaqstan» ulttyq arna túsirgen serıaldar AQSh, Pýerto-Rıko, Kanada, Latyn Amerıkasy elderinde kórsetiledi. Bul týraly «Astana Media Week 2020» barysynda «Qazaqstan» RTRK» AQ Basqarma tóraǵasy Lázzat Tanysbaı aıtty, dep habarlaıdy QazAqparat tilshisi.

«Sońǵy jyldary ónimderdi sheteldik telearnalarǵa belsendi satý arqyly jańa qarjy kózderin arttyrdyq. Karatın kezinde de bul jumys jalǵasty. Bıylǵy jyldyń ózinde halyqaralyq «Ocean New Media, LLC» kompanııasy AQSh, Pýerto-Rıko, Kanada, Latyn Amerıkasy elderiniń spýtnıktik jáne kabeldik arnalary men ınternet platformalary úshin bizden 8 serıal, 6 anımatsııalyq mýltfılm satyp aldy. Endi kompanııa bizdiń kontentti portýgal, aǵylshyn, ıspan tilderine aýdaryp óz kórermenderine usynady», - dedi ol.

Onyń dereginshe, jalpy bólim sany 242 bolatyn 10 serıal TMD-daǵy eń úzdik onlaın-kınoteatr sanalatyn IVI.RU platformasyna satyldy. IVI.RU kontenti bir aıda 50 mıllıonǵa jýyq qaralym jınaıdy.

«Bul – biz úshin úlken naryq», - dedi basqarma tóraǵasy.

Sonymen qatar Lázzat Tanysbaı búgingi tańda korporatsııa medıaaktıvterine qarasty saıttardyń turaqty paıdalanýshylar sany 7 mln-ǵa jáne «Qazaqstan», «Abai tv», «Balapan», «Qazsport» arnalarynyń YouTube jelisindegi jazylýshylarynyń sany 4,3 mln-ǵa jetkenin aıtty.