Qazaqstanda turmystyq zorlyq-zombylyqpen kúres mınıstrlikterdiń josparlaryna enýi múmkin
Bul týraly elordada «Ortalyq Azııa áıelderiniń daýysy» atty IV konferentsııasynda QR Bas prokýrorynyń aǵa kómekshisi Saltanat Tursynbekova málim etti, dep habarlaıdy QazAqparat.
«Birinshiden, bul baǵyttaǵy sharalardy neden bastaýymyz kerek? Biz bul turǵyda tıisti taldaý júrgizdik, ıaǵnı mınıstrlikterdiń strategııalyq josparlaýynda turmystyq zorlyq-zombylyq máseleleri eskerilmegen. Atap aıtqanda, osy zorlyq-zombylyq máseleleri boıynsha árbir organ qyzmetiniń tıimdiligin baǵalaý turǵysynda mınıstrlikterge ındıkatorlardy engizbesek nemese ákimdikterde aýmaqtardy damytý josparlarynda tıisti ındıkatorlardy eskermesek, eshteńe de ózgermeıdi. Osy oraıda árbir ókiletti organ aldyn alý sharalarynyń sýbektisi ekenin túsinýimiz kerek. Sonymen qatar profılaktıkanyń barlyq sýbektileri durys aıqyndalýy tıis. 2009 jyldaǵy zańnamada bilim, densaýlyq saqtaý, áleýmettik qorǵaý mınıstrlikteri profılaktıkanyń sýbektileri qataryna engen, alaıda aldyn alý sharalaryn júrgizýde olardyń róli jazylmaǵan»,-deıdi Tursynbekova.
Onyń sózine qaraǵanda, bul vedomstvolar únemi halyqpen tyǵyz baılanysta bolǵandyqtan, profılaktıka máseleleri olardyń mindetine júktelýi kerek. Mádenıet jáne sport, Ádilet mınıstrlikteri turmystyq zorlyq-zombylyqtyń profılaktıkasy sýbektileriniń qataryna enbeı qalǵan, degenmen osy vedomstvolar birinshi kezekte bul tizimde bolýy tıis.
Konferentsııa barysynda belgili bolǵandaı, jyl saıyn Ortalyq Azııa elderi daǵdarys ortalyqtarynyń telefondaryna 70 myńnan astam qońyraý shalynady eken. Sonymen qatar balalary bar 23 myńǵa jýyq áıel osy ortalyqtar arqyly pana tapsa, 93 myńnan astam adam psıhologtar men zańgerlerdiń kómegine júgirip, áleýmettik súıemelge ıe bolady.