Qazaqstanda turmystyq zorlyq-zombylyq OA-nyń ózge elderinen góri az - BUU
«Áıelderge qatysty turmystyq zorlyq-zombylyq - áleýmettik aýrý sekildi. Biz ony jaı ǵana emdegimiz kelmeıdi. Bizdiń oıymyzsha, daǵdarys ortalyqtaryn kóptep ashý qajet. Búginde olardyń sany óte az. Mysaly, alystaǵy aýdandarda daǵdarys ortalyqtarynyń joqtyǵynan áıelderdiń kómek alý múmkindigi joq», - dedi Ileın Konıkevıch Astanadaǵy turmystyq zorlyq-zombylyqtyń aldyn alý jónindegi halyqaralyq konferentsııa aıasynda jýrnalısterge bergen suhbatynda.
Sonymen birge, sarapshy Qazaqstandaǵy turmystyq zorlyq-zombylyq jaǵdaıy Ortalyq Azııa aımaǵynyń kórshiles elderine qaraǵanda jaqsy ekenin atap ótti.
«Qazaqstandaǵy jaǵdaı aımaqtaǵy basqa kórshi eldermen salystyrǵanda jaqsy. Úkimet baǵdarlamalardy jetkilikti deńgeıde qoldaý úshin qarjylyq múmkindikter barshylyq. Jalpy alǵanda, áıelderdiń jaǵdaıyn jaqsartýǵa munda jaǵdaı bar. Bul basqa elderge qaraǵanda Qazaqstandaǵy jaǵdaı jaqsy ekenin kórsetedi. Mysaly, kórshi elderde zorlyq-zombylyq, jas qyzdardy urlaý jáne taǵy basqa jaǵdaılardyń kóp ekenin bilemiz », - dedi Ileın Konıkevıch.
Eske sala ketsek, elordada «Áıelderge qatysty zorlyq-zombylyqsyz 16 kún» halyqaralyq aktsııasy sheńberinde «Tıimdi yntymaqtastyq arqyly turmystyq zorlyq-zombylyqtyń aldyn alý: daǵdarys ortalyqtaryn damytýdyń jańa kezeńi» atty halyqaralyq konferentsııa ótip jatyr.
Konferentsııa jumysyna Parlament depýtattary, Ulttyq komıssııa músheleri, ortalyq memlekettik organdardyń, halyqaralyq uıymdardyń ókilderi, ІІM qyzmetkerleri, sondaı-aq AQSh, Germanııa, Avstrııa, Rýmynııa, Italııa, Chernogorııa elderiniń sarapshylary qatysýda.
