Qazaqstanda turmystyq zorlyq-zombylyq qurbandarynyń sany ósti
«Koronavırýstyń jańa túriniń jahandyq taralýyna deıin de statıstıka málimetteri búkil álemdegi áıelderdiń úshten bir bóligi óz ómirlerinde qandaıda bir zorlyq-zombylyqty basynan keshirgenin kórsetýde. Karantındik rejım kúsheıgen tusta turmystyq zorlyq-zombylyqtyń ósýi baıqaldy. Qazaqstanda turmystyq zorlyq-zombylyq qurbandaryna arnalǵan jedel telefon jelileriniń birinde 2020 jyly sáýir aıynyń birinshi jartysynda osy jyldyń aqpan aıymen salystyrǵanda shaǵymdar sany 50% artqany týraly aıtyldy. Al boıjetkenderdiń 50%-y otbasyda zorlyq túrindegi tárbıe kórse, onyń ishinde 21%-y dene jaraqatyn alady, 45%-y psıhologııalyq agressııa men zorlyq-zombylyqty basynan keshiredi. Oǵan qosa qaýip-qaterge dýshar bolǵan áıelderge qoldaý kórsetý qyzmetteri shektelip, jabylýda. Vırýs juqtyrý qaýpi jáne qozǵalys shekteýleri saldarynan arnaıy áleýmettik ortalyqtar jańa kelýshilerli qabyldaı almaıdy», - delingen BUU taratqan habarlamada.
Pandemııa kezinde genderlik teńsizdik aıqyndala túsýde.
«Jedel saraptama kórsetkendeı, saýalnamaǵa qatysqan adamdardyń tórtten úsh bóliginde polıtsııaǵa, psıhologııalyq-áleýmettik qyzmetterge, medıtsınalyq nemese basqa mekemelerdiń kómegine júginý múmkindigi joq. Osyndaı adamdarǵa kómektesý úshin Qazaqstan Respýblıkasy Prezıdentiniń janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa Birikken Ulttar Uıymynyń Halyq qorynyń qoldaýymen koronavırýstan qalaı qorǵaýǵa bolatyndyǵy, úıden shyǵý nemese oralǵan kezde ne isteý kerek jáne zorlyqqa tap bolǵan kezde qaıda kómekke júginý kerektigine qatysty beınerolıkter daıyndady», - deıdi Qazaqstandaǵy Birikken Ulttar Uıymynyń Halyq qorynyń ókili Djýlııa Valeze.
Bıyl sáýir aıynda «BUU Áıelder» qurylymy Ortalyq Azııadaǵy azamattyq qoǵam uıymdarymen COVID-19 boıynsha usynystar men sheshimder engizý úshin keńes ótkizdi. Nátıjesinde Qazaqstandaǵy «BUU Áıelder» qurylymy men
Birikken Ulttar Uıymynyń Halyq qory daıyndaǵan tótenshe jaǵdaıdaǵy turmystyq zorlyq-zombylyqtyń aldyn-alý jáne oǵan qarsy is-qımylǵa qatysty zańnamalyq jáne normatıvtik standarttarǵa ózgertýler engizý boıynsha birqatar tájirıbelik usynystar engizildi.
