Qazaqstanda turmystyq zorlyq-zombylyq qurbandarynyń 46%-y erler

NUR-SULTAN. QazAqparat – Elimizde turmystyq zorlyq-zombylyqqa ushyraıtyndardyń 54 paıyzy názik jandar. Bul týraly QR ІІM Ákimshilik polıtsııa komıtetiniń basqarma basshysy Áset Ospanov málim etti, dep habarlaıdy QazAqparat tilshisi.

«Turmystyq zorlyq-zombylyqtyń jartysynan kóbisi mas kúıde jasalady. Osy tusta aıtyp ótetin jaıt, jazany kúsheıtý máseleni sheshpeıdi. Bizdiń oıymyzsha, aldymen otbasynyń áleýmettik-ekonomıkalyq máselesin sheshý kerek. Ekinshiden, nasıhattaý jumysyn jetildire túsken jón. Onyń ishinde eresektermen ǵana emes balalarmen de jumys isteý kerek. Balalardan bastaý kerek. Sebebi eshkim bul ómirge qylmysker bolyp kelmeıdi. Ata-ana da balasynyń qylmysker bolǵanyn qalamaıdy», - dedi Áset Ospanov Ortalyq kommýnıkatsııalar qyzmeti alańynda ótken baspasóz máslıhatynda.

Onyń aıtýynsha, turmystyq janjaldyń sebebi ártúrli.

«Elimizde turmystyq zorlyq-zombylyq qurbandarynyń 54 paıyzy áıelder, qalǵany er adamdar. Kóbine otbasylyq janjaldan týyndaıdy. Turmystyq zorlyq-zombylyq degende tek erli-zaıyptylar arasyndaǵy problema ǵana emes, áke men bala arasyndaǵy kelispeýshilik nemese janjal da jatady. Sol sekildi baýyrlardyń arasynda bolýy da múmkin. Osyǵan uqsas jaıttar turmystyq zorlyq, kúsh kórsetýge jatady», - deıdi ol.

Buǵan deıin jyl basynan beri 2700-den astam áıel daǵdarys ortalyǵyna jiberilgeni aıtyldy.