Qazaqstanda turmystyq hımııa men kosmetıka tańbalanýy múmkin
ASTANA. KAZINFORM — Turmystyq hımııa jáne kosmetıkalyq ónimderdi tańbalaý boıynsha pılottyq joba synaqtan ótkizilip jatyr, dep habarlaıdy Ónerkásip jáne qurylys mınıstrliginiń baspasóz qyzmeti.
2025 jyldyń 21 qarashasynda QR Ónerkásip jáne qurylys vıtse-mınıstri Jánnat Dúbirova GR Procter & Gamble kompanııasynyń aımaqtyq dırektory Andreı Bashkırovpen jáne kompanııanyń Qazaqstan boıynsha bas dırektory Roksana Stancheskýmen kezdesti. Qatysýshylar Qazaqstanda turmystyq hımııa jáne kosmetıkalyq ónimderdi tańbalaý boıynsha pılottyq jobany talqylady.
Pılottyq joba aıasynda tehnıkalyq júzege asyrý úderisiniń synaqtamasy ótkizilip jatyr, sonyń ishinde tańbalaý kodtaryn qoldaný ádisteri, qoldanystaǵy bıznes-protsestermen ıntegratsııa jáne qatysýshylardyń operatsııalyq qyzmetine yqtımal ózgerister bar. Pılottyq jobany Taýarlardy tańbalaý jáne baqylaý boıynsha biryńǵaı operator júzege asyrady.
— Pılottyq jobaǵa qatysý erikti túrde. Oǵan óndirýshiler, ımporttaýshylar jáne turmystyq hımııa ónimderin kóterme jáne bólshek saýdamen aınalysatyn sýbektiler qosyla alady. Bul naryq qatysýshylaryna tańbalaý aqparattyq júıesiniń fýnktsıonaldyǵyn tegin tekserýge, tańbalaý protsesin aǵymdaǵy óndiristik protsesterge biriktirýdi tájirıbeden ótkizýge jáne tańbalaý kodtaryn qoldanýdyń ártúrli ádisterin tekserýge múmkindik beredi, — atap ótti vıtse-mınıstr Jánnat Dúbirova.
Ónimdi tańbalaý ashyq naryqty qurýǵa kómektesedi jáne memlekettik organdarǵa taýarlardyń óndirýshiden sońǵy tutynýshyǵa deıingi qozǵalysyn baqylaýǵa múmkindik beredi, osylaısha jalǵan jáne kontrabandalyq taýarlardy azaıtylady.
Tutynýshylar úshin tańbalaý — bul Naqty Onim mobıldi qosymshasynyń kómegimen ónimniń shynaıylyǵyn óz betinshe tekserý múmkindigi. Qaptamadaǵy kodty skanerleý jetkilikti, sodan keıin ónim, óndirýshi jáne jetkizý tizbegi týraly aqparat qoljetimdi bolady.
Qazirgi ýaqytta úsh ónim tobyna mindetti tańbalaý engizildi: aıaq kıim, temeki ónimderi jáne dárilik preparattar. Toqyma ónerkásip buıymdaryn, syra sýsyndaryn, zergerlik buıymdardy jáne motor maılaryn tańbalaý boıynsha pılottyq jobalar aıaqtaldy. Bıologııalyq belsendi qospalar men turmystyq hımııa taýarlary boıynsha pılottyq joba da júzege asyrylyp jatyr.
Osyǵan deıin Qazaqstanda bıologııalyq belsendi qospalardy (BBQ) pılottyq rejımde tańbalaý boıynsha testter ótkeni anyqtaldy.