Qazaqstanda turmystyq gaz ballondaryna mindetti tańbalaý engiziledi
ASTANA. KAZINFORM — Qazaqstanda suıytylǵan munaı gazyn satatyn turmystyq ballondarǵa mindetti tańbalaý engizý josparlanyp otyr. Jańa talap 2027 jylǵy 1 naýryzdan bastap kúshine enýi múmkin. Energetıka mınıstrligi tıisti buıryq jobasyn ázirlegen.
Qujatqa sáıkes, turmystyq ballondarda satylatyn suıytylǵan munaı gazyn mindetti tańbalaý 2027 jylǵy 1 naýryzdan bastap engizilýi múmkin.
Buıryq jobasynda gaz ballondaryna salynatyn sáıkestendirý quraldarynyń, ıaǵnı tańbalaý kodtarynyń eń joǵary baǵasyn belgileý kózdelgen. Bul rette memleket, bıznes jáne halyq múddeleriniń teńgerimin saqtaý eskerilgen.
Sonymen qatar jańa talap suıytylǵan munaı gazynyń turmystyq ballondardaǵy aınalymyn tsıfrlyq baqylaýǵa múmkindik bermek.
Alaıda qujatqa berilgen túsindirme kestede tańbalaýdyń naqty quny kórsetilmegen.
Buıryq jobasy qoǵamdyq talqylaý úshin «Ashyq NQA» portalynda jarııalanǵan. Talqylaý 18 qarashaǵa deıin jalǵasady.
Buǵan deıin elde maılaý materıaldary men tehnıkalyq suıyqtyqtardy mindetti tańbalaý bastalǵanyn jazdyq.
