Qazaqstanda turmysy tómen otbasylardan shyqqan oqýshylarǵa kómek kórsetý qaǵıdalary ózgerdi

ASTANA. KAZINFORM - Úkimettiń 2025 jylǵy 8 mamyrdaǵy qaýlysyna sáıkes, turmysy tómen otbasylardan shyqqan bilim alýshylarǵa qarjylaı jáne materıaldyq kómek kórsetý tártibi jańartyldy.

Qujatqa sáıkes, kómek kelesi sanattaǵy balalarǵa kórsetiledi: 

• memlekettik ataýly áleýmettik kómek (AÁK) alýǵa quqyǵy bar otbasylardan shyqqan balalar; 
• AÁK almaıtyn, biraq jan basyna shaqqandaǵy tabysy eń tómengi kúnkóris deńgeıinen az otbasylardaǵy balalar;
• otbasynda turatyn jetim balalar men ata–anasynyń qamqorlyǵynsyz qalǵan balalar;
• tótenshe jaǵdaı nátıjesinde jedel kómek qajet etetin otbasylardan shyqqan balalar;
• sondaı-aq bilim berý uıymdarynyń alqalyq organdary aıqyndaıtyn ózge de sanattaǵy bilim alýshylar men tárbıelenýshiler.

Bólingen bıýdjet qarajaty mynadaı maqsattarǵa baǵyttalady:

• kıim, aıaq kıim men oqý quraldaryn satyp alý;
• bilim berý uıymynda bir rettik ystyq tamaq uıymdastyrý;
• qarjylaı kómek kórsetý;
• oqýshylardyń mádenı-kópshilik jáne sporttyq is-sharalarǵa qatysýyn qamtamasyz etý;
• jalpy bilim beretin pánder boıynsha qosymsha sabaqtar uıymdastyrý.

Sondaı-aq, tolyǵyraq aqparatpen qaýly mátininen tanysýǵa bolady. 

Buǵan deıin, Úkimette kámeletke tolmaǵandardyń qaýipsizdigin qamtamasyz etý, olardyń quqyqtaryn qorǵaý jáne quqyq buzýshylyqtyń aldyn alý máseleleri boıynsha keńes ótkenin habarlaǵanbyz.