Qazaqstanda túrmede otyrǵandar sany týraly halyqaralyq uıymdarǵa qate aqparat berilip otyr - Senat Tóraǵasy
ASTANA. 7 jeltoqsan. QazAqparat /Qanat Mámetqazyuly/ - Elimizdiń mınıstrligindegi profıldi komıtetter halyqaralyq uıymdarǵa túrmede otyrǵandar sany týraly qate aqparattar berip otyr.
Tıisti anyqtamalar arqyly buny túzetý qajet. Búgin QR Parlamenti Senatynyń jalpy otyrysynda Qazaqstan táýelsizdiginiń 20 jyldyǵyna baılanysty raqymshylyq týraly zańyn qabyldaý barysynda palata Tóraǵasy Qaırat Mámı osylaı málim etti.
«Jaqynda ǵana halyqaralyq túrme reformasy organy Qazaqstandy túrmede otyrǵandar sany jaǵynan 22 orynǵa qoıypty. Eger 90-jyldary bizdiń elimiz álem elderi arasynda AQSh pen Reseıden keıingi úshinshi orynda tursa, bul kórsetkish árıne jetistik. Degenmen de, halyqaralyq uıymǵa Qazaqstandaǵy bas bostandyǵynan aıyrylǵandar sany 52 myń 600 adam bolyp eseptelip ketken. Bul durys emes. Óıtkeni, Qazaqstandaǵy bas bostandyǵynan aıyrý oryndarynda 45 myń adam ǵana ustalýda. Qalǵan 7 myńy tergeý ızolıatorlarynda qamalǵandar. Olarǵa áli sot úkimi shyqqan emes. Onyń ústine solardyń bári birdeı bas bostandyǵynan aıyrylady deýge bolmaıdy. Sondyqtan da, halyqaralyq uıymǵa Qazaqstandaǵy sottalǵandar sanyn 45 myń adam dep kórsetý qajet edi. Al ondaı jaǵdaıda bizdiń kórsetkishimiz 22-i emes, 40-41 orynda bolatyn edi. Biz ózimizdiń jaǵdaıymyzdy ózimiz nashar kórsetip tastappyz», - dedi Qaırat Mámı.
Osyǵan oraı, ІІM Qylmystyq-atqarý komıtetine eskertý jasaǵan palata Tóraǵasy, aldaǵy ýaqytta osy máselege basa nazar aýdarý qajettigin alǵa tartty. «Halyqaralyq uıymdardaǵy málimetterdi ózgertý úshin qajetti anyqtamalardy berý kerek dep oılaımyn. Al raqymshylyqtan keıingi kezeńde bas bostandyǵynan aıyrylǵan adamdardyń sany odan saıyn azaıa túsedi. Endeshe, Qazaqstannyń kórsetkish odan saıyn jaqsarady», - dedi spıker.
