Qazaqstanda Túrkitildes elder jastarynyń sammıti ótedi

NUR-SULTAN. QazAqparat – Bıyl «Túrkistan – túrki áleminiń besigi» atty Túrkitildes eldiń jastarynyń sammıti ótkizilmek. Bul týraly halyqqa esep berý kezdesýinde QR Aqparat jáne qoǵamdyq damý mınıstri Aıda Balaeva aıtty, dep habarlaıdy QazAqparat tilshisi.

«Jastar saıasatyn júzege asyrý barysynda shet memlekettermen ózara tájirıbe almasý da únemi nazarda. Bul rette, bıyl halyqaralyq deńgeıde «Túrkistan – túrki áleminiń besigi» Túrkitildes elder jastarynyń sammıtin, Azııadaǵy ózara is-qımyl jáne senim sharalary keńesi» elderiniń jastar forýmyn ótkizý josparda bar», - dedi mınıstr.

Sonymen qatar ol otbasy saıasaty baǵytynda «2030 jylǵa deıin genderlik jáne otbasylyq saıasat tujyrymdamasyn iske asyrýdyń is-sharalar josparynyń» ekinshi kezeńi bekitilgendigin aıtty. Tujyrymdama negizinen otbasy ınstıtýtyn nyǵaıtý, reprodýktıvti densaýlyq kútimi, genderlik teńdik, turmystyq zombylyqty boldyrmaý máselelerin qamtıdy.

«Onyń ishinde turmystyq zombylyqpen kúres máselesi óte ózekti. Ókinishke oraı, byltyrǵy karantındik oqshaýlaný kezinde turmystyq janjal faktileri kúrt óskeni bilindi. Al bul máselemen aınalysatyn ortalyqtar elimizdegi tek iri qalalarda ǵana shoǵyrlanǵan. Qazir el aýmaǵynda turmystyq zombylyq qurbandaryna arnalǵan 65 daǵdarys ortalyǵy jumys jasaıdy. Degenmen búginde árbir aýdan jáne qalada osyndaı ortalyqtar ashý qolǵa alynýda. 2025 jylǵa deıin olardyń sanyn 234-ke jetkizý kózdelip otyr», - dedi Aıda Balaeva.