Qazaqstanda túrkiniń jaýyngerlik sport túri - «Alpaǵut» jandanatyn boldy
ASTANA. QazAqparat - Elordada Uly Dalanyń «Alpaǵut» atty jańa áskerı sport túriniń qurylýyna oraı dóńgelek ústel otyrysy ótti, dep habarlaıdy QazAqparat tilshisi.
Atalmysh sport túriniń jandanýyna túrki halyqtarynyń ulttyq sportyna den qoıyp júrgen Yntymaq Qultasov, Vasıb Namazov, Amanjol Túberov, Álibı Aıtqalıev sekildi azamattar kúsh salyp júr. Búgingi dóńgelek ústelge sondaı-aq Qyrǵyz Respýblıkasynan da arnaıy meımandar kelgen.
Uıymdastyrýshylardyń aıtýynsha, «Alpaǵut» sport túri bizdiń dáýirimizge deıin ІІ-ІІІ ǵasyrlarda qurylǵan. Jıyndy júrgizgen Qazaqstannyń eńbek sińirgen qaıratkeri, «Uly dala qyrandary» respýblıkalyq áleýmettik-mádenı qozǵalysynyń teń tóraǵasy Sádibek Túgel ulttyq sport túrin jandandyrý kerektigin atap ótti.
«Búgingi jıynnyń maqsaty - ejelgi er túrkiniń jaýyngerlik sport túri «Alpaǵuttyń» damýy, ósýi men órkendeýin aıqyndaý. Jalpy, qazirgi kezde álemdik kún tártibinde túrki halyqtarynyń yntymaqtastyǵyna erekshe mán berilip otyr. Buny biz Dúnıejúzilik Kóshpendiler oıyndaryndaǵy Ystyqkól sammıtinde anyq baıqadyq. Sonda túrkitildes elderdiń 7 memleketiniń basshylary kelip, osy týraly arnaıy deklaratsııa qabyldap, sol deklaratsııada túrki tildes elderdiń ulttyq sport túrlerin damytý týraly qujat qabyldandy. Mine, búgingi «Alpaǵut» sportynyń jandandyrý jumysy osymen tuspa-tus kelip otyrǵanyna qýanyshtymyz», - dedi ol.
Sádibek Túgel atap ótkendeı, búgingi jıynda úsh másele, atap aıtqanda «Alpaǵuttyń» Qazaqstandaǵy damýy, qurylýy men onyń bolashaǵy, «Alpaǵuttan» Azııa Federatsııasyn qurý jáne 2019 jyly Astanada «Alpaǵuttan» Shyńǵyshan Kýbogyn ótkizý máselesi qaralady.
Dóńgelek ústel barysynda QR «Alpaǵut» túrki sporty federatsııasynyń prezıdenti Yntymaq Qultasov «Alpaǵuttyń» qandaı sport túri ekenin aıtyp berdi.
«Alpaǵut» jekpe-jeginiń túrki álemine mańyzy óte zor. Bul sporttyń tórt júıesi bar: olar «Aıpara», «Batý», «Jaımas» jáne «Gýrash». «Aıpara» - karatege uqsas. Al «Batý» ol - K1, ıaǵnı kıkboksqa uqsaıdy. Odan keıin «Jaımas» degen karate men qoıan-qoltyq jekpe-jektiń qosyndysy, al «Gýrash» degen - MMA sport túrine uqsas jekpe-jektiń túri. «Alpaǵuttan» osyndaı sporttyń tórt túri boıynsha jarys ótkizemiz. Byltyr qarasha aıynda «Alpaǵuttan» jarys ótip, bizdiń jekpe-jekti jaqsy ıgergen 11 sportshymyzdyń segizi oryn aldy. Sonda kelgen memleketterdiń ishinde Qazaqstan komandalyq quramda ekinshi oryndy ıelendi», - deıdi Yntymaq Qultasov.
Qazaqstan jáne Qyrǵyz Respýblıkasynyń ulttyq sportty qoldaýshy taraptary qazirgi ýaqytta «Alpaǵuttyń» jarqyn keleshegin talqylap jatyr. Jıyn qorytyndysy boıynsha «Alpaǵuttan» Azııa federatsııasy qurylmaq.
Foto: alpagutfederation.org/
