Qazaqstanda túrki tilderin tanýǵa ıkemdelgen eń iri JI modeli ázirlendi
ASTANA. KAZINFORM — Qazaqstandyq Cybernet AI startapy túrki tilderin avtomatty túrde tanýǵa arnalǵan (ASR) eń iri modeldi usyndy. Bul týraly Jasandy ıntellekt jáne tsıfrlyq damý mınıstrligi málim etti.
Bul — Ortalyq Azııadaǵy alǵashqy aýqymdy joba jáne túrki tilder tobynyń erekshelikterin eskere otyryp, áýelden aǵylshyntildi sheshimderge beıimdelmeı ázirlengen tolyqqandy jasandy ıntellekt modeli.
Joba Astana Hub, Qazaqstan Respýblıkasynyń Jasandy ıntellekt jáne tsıfrlyq damý mınıstrliginiń strategııalyq qoldaýymen ári Microsoft kompanııasynyń GPU-ınfraqurylymynda júzege asyryldy*.
— Cybernet AI ázirlemesi túrki tilder tobyna kiretin elderge tsıfrlyq servıster men klıentterge qyzmet kórsetýdi ana tilinde, sapany joǵaltpaı jáne qoljetimdi baǵamen jasandy ıntellekt arqyly aýqymdy túrde damytýǵa múmkindik beredi. Qazaqstan úshin bul jahandyq AI-sheshimderdi tutynýshy rólinen halyqaralyq deńgeıde básekege qabiletti óz tehnologııalaryn ázirleýshi elge aınalý degen sóz, — dedi Astana Hub basqarýshy dırektory Tańat Óskembaev.
Model qazaq, túrik, ózbek, qyrǵyz, ázerbaıjan jáne tatar tilderiniń negizinde ázirlengen, sondaı-aq bızneste jáne memlekettik qyzmetter kórsetý barysynda keń taralǵan túrki-orys aralas sóıleý barysynda da tilderdi dál tanıdy.
Osy ýaqytqa deıin Qazaqstan men Ortalyq Azııa elderi negizinen aǵylshyn tiline baǵyttalǵan halyqaralyq ASR-modelderdi paıdalanýǵa májbúr boldy. Mundaı sheshimder túrki tilderiniń fonetıkasyn, aktsentterin jáne aralas sóıleý erekshelikterin jetkilikti deńgeıde eskermeı, daýysqa negizdelgen AI-servısterdiń sapasyn shektep keldi.
Cybernet AI bul máselege ózge qózqaraspen qarady: kompanııa óńir ishinde jáne óńir úshin arnaıy model jasap, oǵan qazirgi zamanǵy túrki tilderiniń lıngvıstıkalyq erekshelikterin engizdi.
— Biz aǵylshyn tildi modelderdi beıimdeýden sanaly túrde bas tartyp, tabıǵı, aralas aýyzeki sóıleýdi bastapqydan túsinetin ASR-model ázirledik. Bul sheshimdi jaı ǵana tehnologııalyq ónim emes, Qazaqstannyń jasandy ıntellekt salasyndaǵy jergilikti ekojúıesin jáne tehnologııalyq egemendigin qalyptastyrýǵa qosylǵan úles dep qarastyrýǵa bolady, — dedi Cybernet AI kompanııasynyń tehnıkalyq dırektory Rashıd Ismaılov.
Jańa ASR-model úlken kólemdegi daýys kommýnıkatsııalarymen jumys isteıtin bızneske baǵyttalǵan: bankter men qarjy uıymdaryna, telekom-operatorlarǵa, ártúrli deńgeıdegi baılanys ortalyqtaryna, logıstıkalyq jáne servıstik kompanııalarǵa, sondaı-aq halyqqa qyzmet kórsetetin memlekettik qurylymdarǵa arnalǵan.
Ázirleýshilerdiń pikirinshe, bul model klıentterdi qoldaý arnalary boıynsha shyǵyndardy azaıtyp, barynsha suranysqa ıe daýys formatynda táýlik boıy qyzmet kórsetýge múmkindik beredi.
Model qorshaǵan ortanyń shýyna, aktsentterge jáne sóılem barysynda til aýystyrýǵa tózimdi, sondaı-aq fıntehten bastap memlekettik qyzmetterge deıingi ártúrli salalarda birdeı joǵary dáldikti kórsetedi.
«Cybernet AI» kompanııasy — Astana Hub qatysýshysy, bankterdiń, fınteh-kompanııalardyń jáne basqa da retteletin salalardyń baılanys ortalyqtaryna arnalǵan qorǵalǵan korporatıvtik AI-sheshimderdi ázirleýge mamandanǵan. Kompanııa platformasy joǵary ónimdilikti, baqylanatyn masshtabtaýdy jáne qaýipsizdik pen regýlıatorlyq talaptardy qatań saqtaı otyryp, operatsııalyq shyǵyndardy edáýir qysqartýdy qamtamasyz etedi.
Cybernet AI Qazaqstanda, Ózbekstanda, Qyrǵyzstanda, AQSh-ta, Meksıkada jáne Mysyrda jumys isteıdi, sondaı-aq Ulybrıtanııa men EO elderinde jobalar júzege asyrýda. Kompanııa sheshimderi 34 tildi qoldaıdy, onyń ishinde qazaq, ózbek, orys, aǵylshyn, arab jáne ıspan tilderi bar.
Eske sala keteıik, buǵan deıin jasandy ıntellekt týraly zań kúshine engenin jazdyq.