Qazaqstanda týrızmnen túsken salyq túsimderi 303 mlrd teńgege jetti

ASTANA. KAZINFORM – Qazaqstanda týrızm salasynan túsetin salyq túsimderi 303 mlrd teńgege jetti. Al sheteldik týrıster el aýmaǵynda 1,4 mlrd AQSh dollaryn jumsaǵan. Bul týraly QR Sport jáne týrızm mınıstri Erbol Myrzabosynov Ortalyq kommýnıkatsııalar qyzmetinde ótken baspasóz máslıhatynda málimdedi.

SQO-da kásipkerlerdiń salyq bereshegi 6 mlrd teńgege jýyq
Foto: Kazinform/JI

Mınıstrdiń aıtýynsha, sońǵy kezeńde týrızm salasynyń negizgi kórsetkishteri boıynsha oń dınamıka qalyptasqan. Sala el ekonomıkasyndaǵy úlesin arttyryp, jumyspen qamtý men ınvestıtsııa tartýdyń mańyzdy baǵyttarynyń birine aınalyp keledi.

– 2026 jyldyń birinshi jartyjyldyǵynda ornalastyrý oryndarynda 5 mln-ǵa jýyq adamǵa qyzmet kórsetildi. Bul ótken jyldyń sáıkes kezeńimen salystyrǵanda 5 paıyzǵa kóp. Al kórsetilgen qyzmet kólemi 15 paıyzǵa ósip, 173,7 mlrd teńgeni qurady, – dedi Erbol Myrzabosynov.

Onyń dereginshe, búginde týrızm salasynda 565 myńnan astam adam eńbek etedi. Bul elimizdegi jalpy jumyspen qamtylǵan halyqtyń 6 paıyzyna teń.

Sala bıýdjet kirisine de eleýli úles qosyp otyr. Atap aıtqanda, týrıstik qyzmetten túsken salyq túsimderiniń kólemi 303 mlrd teńgege jetken. Bul jalpy salyq túsimderiniń 2,1 paıyzyn quraıdy.

Budan bólek, sheteldik týrısterdiń Qazaqstanda jumsaǵan qarajaty 1,4 mlrd AQSh dollaryna jetken. Mınıstr bul kórsetkish elimizge keletin týrısterdiń ulttyq ekonomıkaǵa qosatyn úlesi artyp kele jatqanyn ańǵartatynyn atap ótti.

Týrızm salasyna ınvestıtsııa tartý baǵytynda da ósim baıqalady. Bıylǵy toǵyz aıda negizgi kapıtalǵa salynǵan ınvestıtsııa kólemi 1 trln 319 mlrd teńgeni quraǵan. Bul 2025 jyldyń sáıkes kezeńindegi kórsetkishten 68 paıyzǵa joǵary.

Mınıstrdiń sózinshe, aldaǵy kezeńdegi negizgi mindet – Qazaqstannyń týrıstik áleýetin tolyq paıdalanyp, salanyń ekonomıkalyq tıimdiligin arttyrý jáne eldi halyqaralyq týrıstik baǵyt retinde damytý.

Aıta keteıik, Іshki týrızm 84,4% ósti.