Qazaqstanda týrızmge salynǵan ınvestıtsııa 1,2 trln teńgeden asty

Úkimet málimetinshe, búginde týrızm el ekonomıkasynyń ósimi men Qazaqstannyń halyqaralyq deńgeıdegi tartymdylyǵyn arttyratyn negizgi salalardyń birine aınalyp keledi.

Elimizge 15,7 mln shetel azamaty kelgen. Onyń ishinde 11,1 mln adam Qazaqstan aýmaǵynda bir táýlikten astam ýaqyt bolǵan. Al ishki týrıster sany 10%-ǵa ósip, 8,6 mln adamǵa jetken.

– Qonaqúıler men demalys oryndary kórsetken qyzmet kólemi 17%-ǵa artyp, 350 mlrd teńgeni qurady. Týrızm salasyna tartylǵan ınvestıtsııalar 32,6%-ǵa ósip, 1,256 trln teńgege jetti. 2020 jyldan beri 573 ınvestıtsııalyq joba iske asyrylyp, ornalastyrý oryndarynyń sany 25%-ǵa artyp, 4 482 nysanǵa jetti, – delingen Úkimet habarlamasynda.

Týrıster úshin qolaıly jaǵdaı jasaý maqsatynda 84 memlekettiń azamattaryna vızasyz rejım engizilgen. Sonymen qatar 102 eldiń azamattary Qazaqstannyń elektrondyq vızasyn rásimdeı alady.

Qazaqstan búginde 30 elmen halyqaralyq áýe qatynasyn júzege asyrady. Aptasyna 145 baǵyt boıynsha 812 halyqaralyq reıs oryndalady. Sondaı-aq 17 áýejaıda besinshi «áýe erkindigi» dárejesimen «ashyq aspan» rejımi qoldanylady.

– Qazirgi ýaqytta Kendirli, Zaısan jáne Qatonqaraǵaıda jańa áýejaılar salynyp jatyr. Arqalyq áýejaıy qalpyna keltirilýde. Sonymen qatar Almaty, Úrjar, Shymkent jáne Pavlodar áýejaılaryndaǵy termınaldar men ushý-qoný jolaqtary jańǵyrtylyp jatyr, – dep málimdedi Úkimet.

Budan bólek, Şýche-Býrabaı kýrorttyq aımaǵyn, «Mańǵystaý» týrıstik aımaǵyn jáne Almaty taý klasterin damytýǵa arnalǵan keshendi josparlar ázirlengen.

Týrızm salasyn qoldaý jónindegi jańa zańǵa sáıkes, gıdterdiń qyzmetin jeke kásipker retinde mindetti tirkeý talaby alynyp tastaldy. Sondaı-aq vızıt-ortalyqtardyń qyzmeti rettelip, týrıstik avtobýstardyń memlekettik shekaradan jedel ótýi úshin «jasyl dáliz» tetigi engizildi.

Aıta keteıik, týrızm salasyn damytýdyń 2029 jylǵa deıingi tujyrymdamasy jańartyldy.