Qazaqstanda týrızm týraly jańa zań ázirlendi
ASTANA. QazAqparat - Týrızm týraly zańnan bólek, Elbasy tapsyrmasyna sáıkes týrızmge qatysty memlekettik baǵdarlama ázirlený ústinde, dep habarlaıdy QazAqparat tilshisi.
«Memleket basshysy 2018 jylǵy 5 qazandaǵy «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýynda týrızmdi damytý boıynsha jekelegen salalyq memlekettik baǵdarlama ázirleýdi tapsyrdy. Atalǵan baǵdarlama búginde aıaqtalý satysynda tur jáne aldaǵy 3-4 aı ishinde ol tolyqtaı daıyn bolady. Odan bólek, týrızm boıynsha zań jobasy ázirlendi, ol aldaǵy jarty jyl ishinde Parlament qaraýyna usynylady», - deıdi «Kazakh Tourism» ulttyq kompanııasy» AQ basqarma tóraǵasy Rashıd Kúzembaev.
Onyń aıtýynsha, atalǵan memlekettik baǵdarlama 6 negizgi baǵyttan turady. Jáne onda elimizdiń týrıstik brendin ilgeriletý strategııasynyń negizgi erejeleri kórsetilgen.
«Іshki týrızmdi ilgeriletý strategııasy úsh kezeńge bólingen. Birinshi kezeńde maqsatty elderdiń alǵashqy eki tobyn nazarǵa ala otyryp, ulttyq týrıstik brend pen sýbbrendterge basymdyq beriledi. Ekinshisinde týrıstik ónimderge jasalatyn jarnamaǵa kóńil bólinedi. Al úshinshi kezeńde perspektıvalyq naryqtarmen jumys jáne maqsatty elder sanyn keńeıtýge qatysty jasalatyn jumys alǵa qoıylady»,- dedi ol.
Kompanııa basshynyń málimetinshe, atalǵan eki qujat qabyldansa, Qazaqstan týrızminiń álem kartasynda jańa týrıstik baǵdar retinde júıeli damýyna jol ashylady.
Aıta ketsek, ótken jyly Qazaqstanǵa syrttan qansha týrıst kelgeni týraly habarlaǵan bolatynbyz.
