Qazaqstanda týrızm salasynda qyzmet kórsetý kólemi 2011 jyly 9,1 paıyzǵa ulǵaıdy - Muhıt Saımasaev
ALMATY. 24 mamyr. QazAqparat - Týrızm salasyndaǵy qyzmet kórsetý kólemi 2011 jyly jalpy ishki ónimniń 0,2 paıyzyn qurady.
Ony QR Indýstrııa jáne jańa tehnologııalar mınıstrliginiń týrızm ındýstrııasy komıteti tóraǵasynyń orynbasary Muhıt Saımasaev búgin Almatyda ótken «Almaty qalasynda týrızmdi damytýdyń qazirgi jaǵdaıy men keleshegi» degen taqyryptaǵy alqaly jıynda aıtty.
«QR Statıstıka agenttiginiń derekterine qaraǵanda, respýblıkada 2011 jyly týrızm salasynda qyzmet kórsetý aldyńǵy jylmen salystyrǵanda 9,1 paıyzǵa ulǵaıdy. Onyń kólemi 1 mıllıard teńgeden asyp, jalpy ishki ónimniń 0,2 paıyzyn qurady. Sondaı-aq 2010 jylmen salystyrǵanda syrtqy týrızmmen kelýshiler 14,2 paıyzǵa ósip, 3 mıllıon 834 myń adamdy qurady», - deıdi M. Saımasaev. Onyń aıtýynsha, syrtqa shyǵý týrızmi 24,5 paıyzǵa artqan. Respýblıkada 1407 kásiporyndar men jeke kásipkerler kelýshilerildi ornalastyrýmen aınalysty. Al ornalastyrý nómirleriniń sany 37 myń 440. Ondaǵy bir mezgilde ornalastyrý orny 81 myń 275 kereýet. Meımanhanalardy toltyrýdaǵy ortasha kórsetkish 23 paıyzdy qurady.
