Qazaqstanda týrızm salasynda qansha joba iske asyrylyp jatyr

NUR-SULTAN. QazAqparat – Búgin Májilistegi Úkimet saǵatynda QR Mádenıet jáne sport mınıstri Dáýren Abaev týrızm baǵytyndaǵy ınvestıtsııalyq jobalar týraly aıtyp berdi, dep habarlaıdy QazAqparat tilshisi.

«Bıznestiń ınvestıtsııalyq belsendiligi jandandy. Destınatsııasy eń joǵary 10 óńirde 2019-2021 jyldary jalpy somasy 395,5 mlrd teńge bolatyn 276 ınvestıtsııalyq joba paıdalanýǵa berildi. 5 200 jańa jumys orny quryldy. Ótken jyldyń basynan beri jalpy somasy 226 mlrd teńge bolatyn 102 nysan iske qosyldy. 2019-2021 jyldarda júzege asyrylǵan eń iri jobalardan: Túrkistandaǵy «Kerýen-Saraı» keshenin, «Rixos Turkistan» jáne «Hampton by Hilton» qonaq úılerin, Aqtaý qalasyndaǵy «Rixos Water World Aktau» keshenin jáne «Tetys Blu» parkin, Nur-Sultan qalasyndaǵy «Sheraton» qonaq úıin, Býrabaı-Şýchınsk kýrorttyq aımaǵyndaǵy «Baıtas» qonaq úıin, sondaı-aq, «Swissotel Almaty» jáne basqa da jobalar iske qosyldy», - dedi D. Abaev.

Sonymen qatar ol ınvestıtsııasynyń jalpy kólemi 1,5 trln teńgeni quraıtyn 145 jobany júzege asyrý jalǵasyp jatqanyn, onda 7 myńnan astam jumys orny qurylatyndyǵyn jetkizdi.

«Oǵan qosa, baǵalaý somasy 1,5 trln teńgeni quraıtyn 46 ınvestıtsııalyq joba pysyqtalyp jatyr. Memlekettik baǵdarlama qabyldanǵan sátten bastap týrdestınatsııa ınfraqurylymynyń alǵashqy ondyǵynyń jalpy qajettiliginen 97 jobany júzege asyrýǵa túrli baǵdarlamalar men josparlar boıynsha 140,4 mlrd teńge bólindi. Onyń ishinde 2021 jyly 50 jobaǵa 63,5 mlrd teńge bólindi. Búgingi tańda 47 ınfraqurylym jobasy aıaqtaldy. Mysaly, byltyr Aqtaý qalasyndaǵy Jyly jaǵajaıdy ıgerý baǵytynda tike avtojolmen, elektr qýatymen jáne sýmen qamtamasyz etý jumystary qarqyndy júrgizildi. Sondaı-aq Alakól kóliniń ońtústik bóligindegi jaǵalaýdy bekitý jumystaryna, týrıstik maýsymǵa deıin aıaqtalýy josparlanǵan Úsharal jáne Úrjar áýejaılaryn qalpyna keltirý jumystaryna da qarjy bólindi», - dedi mınıstr.

Osy oraıd ol týrızm ınfraqurylymsyz damymaıtynyn atap ótti. Sondyqtan bólingen qarajat 573,7 shaqyrym avtojoldy, 321,4 shaqyrym sý tartý / káriz jelisin, 291,3 shaqyrym sýmen jabdyqtaýdy, 108,6 shaqyrym elektr energııasyn berý jelilerin jáne basqa da jobalardy jol-kóliktik ári ınjenerlik ınfraqurylym turǵysynan damytýǵa múmkindik beredi.