Qazaqstanda týrızm salasyna tartylǵan ınvestıtsııa kólemi 38,1%-ǵa ósti

ASTANA. KAZINFORM — El Úkimeti Memleket basshysynyń tapsyrmalaryn júzege asyrý sheńberinde týrızm jáne sport salalary boıynsha 2025 jyldy qorytyndylady, dep habarlaıdy QR Premer-mınıstriniń baspasóz qyzmeti.

Sonymen qatar sport salasynyń úzdik ókilderin marapattaýǵa arnalǵan «Úzdik — 2025» syılyǵyn tabystaý rásimi ótti.

Týrızm jáne sport mınıstri Erbol Myrzabosynov bıyl Qazaqstanda týrıstik aǵynnyń ósýi baıqalǵanyn málimdedi. 2025 jyldyń qańtar-qyrkúıek aılarynyń qorytyndysy boıynsha elimizge týrıstik maqsatta 12,1 mln shetel azamaty kelgen. Olardyń 8,6 mln-y elde bir táýlikten astam ýaqyt bolǵan sheteldik týrıster retinde jiktelgen. Ornalastyrý oryndarynyń qyzmetin 1 mln sheteldik jáne 6,7 mln ishki týrıst paıdalanǵan, bul syrttan kelgen týrızm men ishki týrızmniń turaqty ósimin kórsetedi.

Vedomstvo derekterine sáıkes, elimizde bir mezgilde 243,5 myńnan astam jatyn orynǵa eseptelgen 4 499 ornalastyrý nysany jumys isteıdi. 

— Qonaqúıler men ózge de ornalastyrý nysandarynyń jıyntyq tabysy 268 mlrd teńgege jetip, óńirlerdegi iskerlik belsendilik pen týrıstik tutynýdyń artqanyn kórsetti. 2025 jyldyń qańtar-qazan aılarynda týrızm salasyna tartylǵan ınvestıtsııa kólemi 38,1%-ǵa ósip, 923 mlrd teńgeni qurady, — delingen habarlamada.

Sonymen qatar eldiń 20 óńirinde 147 ınfraqurylymdyq joba júzege asyrylyp jatyr. Bul salaǵa jeke jáne ınstıtýtsıonaldyq kapıtaldyń joǵary qyzyǵýshylyǵyn dáleldeıdi. 

Budan buryn Mańǵystaý ákimi Bozjyrada alǵashqy qonaqúı qurylysy bastalǵanyn aıtty.