Qazaqstanda týrızm damýy úshin kórshi elde kóterilis bolýy kerek pe? - respýblıkalyq basylymdarǵa sholý
ASTANA. Shildeniń 14-i. QazAqparat /Aıdar Ospanalıev/ - Qazaq aqparat agenttigi respýblıkalyq basylymdarda shildeniń 14-i, sársenbi kúni shyqqan ózekti materıaldarǵa sholýdy usynady.
***
Kárim Másimov úkimeti elimizde osyǵan deıin bekitilgen «Aýyz sý» baǵdarlamasynan bas tartyp, jańa baǵdarlama engizbek. Ony júzege asyrýǵa 2020-jylǵa deıin jyl saıyn 90 mıllıard teńge bólip turý týraly másele Qarjy mınıstrligimen pysyqtalyp úlgeripti. Atalmysh somanyń 60 mıllıardy respýblıkalyq bıýdjetten, 30 mıllıardy jergilikti bıýdjetten bólinbek. Buǵan qosa úkimet atalmysh baǵdarlamany júzege asyrý isine ınvestorlardy da tartpaq. «Atalmysh másele jóninde egjeı-tegjeıli bilgińiz kelse, «Aıqyn» basylymynyń búgingi sanyndaǵy «Ańqasy kepken aýyldardyń qarasy ósýde» atty maqalany oqyńyz.
Sondaı-aq osy basylymnyń habarlaýynsha, elimizde jumyssyzdar sany azaıyp keledi. Mysaly, ótken jyldyń maýsym aıynda jumyssyzdar sany 559 myń adam bolsa, bıyl bul kórsetkish 496 myń adamdy quraǵan.
Sondaı-aq basylym tilshisiniń Statıstıka agentiginiń tóraǵasy Álıhan Smaıylovtyń derekterine súıene otyryp keltirgen málimetteri boıynsha, osy jyldyń maýsym aıynda ınflıatsııa deńgeıi 4,5 paıyzdan aspaǵan. Al azyq-túlik taýarlarynyń baǵasy 5,6 paıyzǵa, azyq-túlik emes taýarlar 2,7 paıyzǵa, aqyly qyzmet kórsetý 4,6 paıyzǵa ósken. Statıstıka agenttiginiń málimetteri negizinde daıyndalǵan elimizdiń áleýmettik-ekonomıkalyq jáne ózge de salalaryndaǵy ózgerister jóninde «Aıqynnyń» búgingi sanyndaǵy «Bıylǵy ınvestıtsııanyń kólemi joǵary» atty maqaladan bilýge bolady.
***
«Alash aınasy» elimizde ótetin Azııa oıyndaryna daıyndyq jumystaryna alańdaýly. «Endi birer aıdan soń Almaty jáne Astana qalalary VII qysqy Azııa oıyndaryn qabyldaıdy. Degenmen qazaq jerinde tuńǵysh ret ótkeli jatqan iri doda bolǵandyqtan ba, uıymdastyrýshylar tarapynan keıbir kemshilikterdiń kezdesip jatatyny jasyryn emes», deı kele basylym tilshisi VII qysqy Azııa oıyndarymen baılanysty kóptegen kemshilikter jóninde jazady. Bul máseleler jóninde tolyqqandy aqparat alý úshin «Alash aınasy» basylymynyń búgingi sanyndaǵy «Aq Azıada daıyndyǵy alańdatady» atty maqalany oqý qajet
Sondaı-aq basylymnyń búgingi sanynda «Jol erejesin buzýdan Jetpisbaevtyń «Djıpi» jetkizer emes» atty qyzyqty maqala jarııalanypty. Tilshiniń sózine sensek, sheneýnikterdiń qyzmet kóliginiń qymbattyǵy jóninen Shymkent qalasynyń ákimi Arman Jetpisbaevtyń «Lexus LX 570» kóligi kósh bastap tur jáne bul týraly málimetter basylym betinde buryn da jarııalanǵan. Eń qyzyǵy ońtústiktegi sheneýnikter mingen mashınalardyń ereje buzýy jaǵynan da Shymkent qalasynyń ákimi Arman Jetpisbaevtyń memlekettik nómiri «X 070 OK» kóligi tizimniń eń basynda tur. Onyń ereje buzǵan 22 oqıǵasynyń ekeýinde baǵdarshamnyń qyzyl túsine ótip ketken bolsa, qalǵan 20 jaǵdaıda jyldamdyqty shekten tys asyrǵan. Qaladaǵy №1 basshysynyń eser áreketteri jóninde basylymnyń osy nómirinen oqýǵa bolady.
***
«Qazaqstandyq týrısterdiń elde qalýy úshin mindetti túrde kórshi elde kóterilis bolýy kerek emes. Qazaqstandyqtar jaz mezgilinde Ystyqkólge baryp demalýǵa tyrysady. Alaıda Ystyqkólde men de bolǵanmyn. Ol jerdiń alyp bara jatqan eshteńesi joq. Infraqurylymy damymaǵan. Tipti tamaq ishetin jerdiń ózin tabý qııamet-qaıym. Ondaǵy ıgilik tek taza aýa men sý ǵana. Týrıstik fırmalar da ol jaqty jaqsy biledi. Bar bolǵany osy ǵana. Sondyqtan elimizdiń Týrızm jáne sport mınıstrligi eldegi kýrorttardy damytý isin qolǵa alǵany jón», degen pikirin bildiripti Májilis depýtaty Vladımır Nehoroshev «Lıter» basylymyna bergen suhbatynda. Al Qazaqstandyq týrıster qaýymdastyǵynyń dırektory Rashıda Sháıkenovanyń aıtýynsha, ótken jyly qarjy daǵdarysynyń saldarynan týrıster asa belsendilik tanyta qoımady. Esesine olar bıylǵy jyly erekshe belsendi jáne saıahatshylar men demalýshylardyń kóp bóligi Alakólge baryp jatyr. Osy máselege baılanysty ózge de sala mamandarynyń pikirin bilgińiz kelse, «Lıterdiń» búgingi sanyndaǵy «V Kyrgyzstane - revolıýtsııa, v Taılande - besporıadkı. Chto eşe nýjno proızoıtı v mıre chtoby kazahstantsy provodılı otpýsk ý sebıa doma» atty maqalany oqyńyz.
***
«Astananyń basshylary shahardaǵy bala baqshalar sanyn jedel túrde kóbeıtýge bel býdy. Osy jyldyń sońyna deıin qalada 7 bala baqsha jumys isteı bastaıdy», dep jazady «Izvestııa». Elorda ákimi Imanǵalı Tasmaǵambetovtyń astanadaǵy bala baqshalarda bolǵan kezinde kóterilgen máseleler jóninde «Izvestııanyń» osy sanyndaǵy «Detsad stanet dostýpnee» atty maqaladan bilýge bolady.
