Qazaqstanda týrıstik avtobýs aıaldamalarynyń jobasy jarııalandy
ASTANA. QazAqparat - «QazAvtoJol» UK» AQ týrıstik jáne qalaaralyq avtobýs aıaldamalaryna arnalǵan sáýlettik baıqaý qorytyndysyn jarııalady, dep habarlaıdy QazAqparat.
Baıqaýǵa 8 sáýletshi qatysqan jáne «QazAvtoJol» UK» AQ sarapshylar komıssııasynyń sheshimimen reıstik avtobýstar aıaldamasy baıqaýynda «Sáýlet-stýdııa» JShS jobasy úzdik dep tanyldy.
«Jeńimpaz toptyń jobasyn aıaldama salýshylar júzege asyrady jáne olar Qazaqstan avtojoldarynyń betkeustaryna aınalady. «QazAvtoJol» UK» AQ baıqaý qatysýshylaryna týrızmniń damýyna úlken úles qosqandary úshin alǵys bildiredi», - delingen aktsıonerlik qoǵamnyń resmı habarlamasynda.
Eske sala ketsek, týrıstik jáne qalaaralyq avtobýs aıaldamalaryna arnalǵan ashyq sáýlettik baıqaý 2018 jyldyń 25 tamyzyna deıin sozylǵan bolatyn. Baıqaýdyń júlde qory 200 myń teńgeni qurady.
