Qazaqstanda týrısterge arnalǵan vızıt-ortalyqtardyń jumysyna biryńǵaı standart engiziledi
ASTANA. KAZINFORM – Týrızm jáne sport mınıstrligi vızıt-ortalyqtardyń qyzmetin retteıtin biryńǵaı qaǵıdalardy bekitkenin habarlady. Qujat týrıstik nysandarda, baǵyttarda jáne týrıstik aımaqtarda ornalasqan vızıt-ortalyqtardyń qyzmetine qoıylatyn biryńǵaı talaptardy aıqyndaıdy.
Kásipkerlik sýbektileri ashatyn vızıt-ortalyqtar týrısterge qajetti aqparat pen qyzmet kórsetip, týrıstik servıstiń sapasyn arttyrýǵa, saıahat-saparlardyń qaýipsizdigin qamtamasyz etýge jáne zamanaýı týrıstik ınfraqurylymdy damytýǵa yqpal etedi.
Eske sala keteıik, bıyl vızıt-ortalyqtardyń mártebesi zańnamalyq turǵyda týrısterdi aqparattandyrýǵa jáne týrıstik qyzmet kórsetýge arnalǵan týrızm nysany retinde bekitildi. Sonymen qatar olardy ornalastyrý, salý, jańǵyrtý, jabdyqtaý, kútip-ustaý jáne paıdalaný máseleleri zańnamalyq deńgeıde retteldi.
Sondaı-aq ýákiletti organǵa vızıt-ortalyqtardyń jumys tártibi men olarǵa qoıylatyn talaptardy bekitý quzyreti berildi. Qaǵıdalarǵa sáıkes vızıt-ortalyqtar týrısterge óńirlerdiń týrıstik áleýeti, kórikti jerleri, týrıstik baǵyttary men nysandary týraly ózekti aqparat usynady, kelýshilerge keńes beredi, aqparatty ýaqytyly jańartyp otyrý úshin týrıstik aqparattyq ortalyqtarmen ózara is-qımyl jasaıdy jáne Qazaqstan Respýblıkasynyń zańnamasyna sáıkes týrıstik qyzmetter kórsetedi.
Qujatta qaýipsizdik máselelerine erekshe nazar aýdarylǵan. Týrıstik nysandarǵa nemese baǵyttarǵa barý múmkindigine áser etetin jaǵdaılar týyndaǵan kezde, bul týraly aqparat vızıt-ortalyqta jáne onyń ınternet-resýrsynda aqparat túsken sátten bastap bir saǵattan keshiktirilmeı jarııalanýy tıis. Qaǵıdalar vızıt-ortalyqtardyń jumys rejımin de aıqyndaıdy. Ol nysannyń ornalasqan jerine, týrıster legine jáne týrıstik resýrstarǵa barý tártibine qaraı jyl boıy nemese maýsymdyq negizde jumys isteýi múmkin.
Kelýshilerge qyzmet kórsetý memlekettik, orys jáne aǵylshyn tilderinde júzege asyrylady. Budan bólek, qujatta múgedektigi bar adamdar men halyqtyń júrip-turýy shekteýli ózge de toptarǵa kedergisiz orta qalyptastyrý kózdelgen. Sondaı-aq personaldyń kásibı biliktiligi men qyzmet ádebine qoıylatyn talaptar belgilenip, Qazaqstan Respýblıkasynyń zańnamasyna sáıkes vızıt-ortalyqtar janynan qoǵamdyq tamaqtaný, saýda, ornalastyrý jáne basqa da servıstik ınfraqurylym nysandaryn ornalastyrýǵa múmkindik beriledi.
Atalǵan qaǵıdalardyń qabyldanýy elimizdiń barlyq óńirinde vızıt-ortalyqtardyń jumysyna biryńǵaı standart engizýge, týrısterdi ýaqtyly ári shynaıy aqparatpen qamtamasyz etýge, qyzmet kórsetý sapasyn arttyrýǵa jáne Qazaqstan boıynsha saıahattaýǵa qolaıly ári qaýipsiz jaǵdaı jasaýǵa múmkindik beredi.
Jyl basynan beri Almatynyń vızıt ortalyqtaryna qansha sheteldik týrıst barǵanyn jazǵan edik.
