Qazaqstanda Týrıster úshin kepildendirý qory qurylmaq
ASTANA.QazAqparat - Qazaqstanda árbir týrısten 0,5 AEK kóleminde alym alý esebinen Týrıster úshin kepildendirý qoryn qurý josparlanýda. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi brıfıngte Investıtsııalar jáne damý vıtse-mınıstri Albert Raý málim etti.
«Sóz bizdiń týrısterdi qorǵaý týraly bolyp otyr. Ózderińizde bilesizder,týrısterge qatysty problemalar jıi týyndaıdy. Bul maýsymda charterler máselesi durys ótken sııaqty. Biraq, problemalar shyǵyp qalady. Esterińizde bolsa, bir qonaq úı bankrotqa ushyrap, týrısterimiz bizdiń is-qımyl aıamyzdan tysqary qalyp qoıǵan bolatyn. Sondyqtan da kepildendirý qoryn qurý usynylady. Oǵan árbir týrısten 0,5 eseptik kórsetkish kóleminde alym aýdaryldy. Úkimet ony kim basqaratynyn aıqyndaıdy»,- dedi A.Raý. Sonymen qatar, ol eger týrıstik operatorlar charterlik avıa reısterdi paıdalanatyn bolsa, onda olar depozıtke belgili bir somany salýy qajet bolatyndyǵyn atap ótti. Vıtse-mınıstrdiń sózine qaraǵanda, qıyndyq týyndaǵan sátte atalǵan depozıtten aqsha alynyp, qazaqstandyq týrısterdiń elge oralýyna tólenetin bolady. Charterlik jazdyq baǵdarlama aıaqtalǵannan keıin depozıttegi qarjy týrıstik operatorlarǵa qaıtarylady. QR IDM Týrızm departamentiniń dırektory Tımýr Dúısenǵalıev óz kezeginde depozıttegi soma týrısterdi elge qaıtarý úshin 3-4 charterlik reıske jetýi tıistigin basa aıtty.
