Qazaqstanda týrıster arasynda tanymal glempıng ortalyqtar
ASTANA. KAZINFORM - Glempıng – jaı ǵana demalys emes, tabıǵat pen jaılylyqty úılestiretin erekshe ómir salty. Munda týrıster tabıǵat aıasynda demalyp, qonaqúı deńgeıindegi qyzmetke qol jetkize alady.
Búginde glempıngter álem boıynsha da, elimizde de keńinen tanymal bola bastady. Týrızm jáne sport mınıstrligi týrıster arasyndaǵy eń úzdik glempıng ortalyqtardy usyndy.
L•E•S Hotel & Resort (Býrabaı)
Bul glempıng Býrabaıdyń qylqan japyraqty ormanynyń dál ortasynda ornalasqan. A-frame úlgisindegi úıler panoramalyq terezelermen jabdyqtalǵan, ıntereri skandınav stılinde bezendirilgen. Munda bári sanaly ári baıaý demalys úshin oılastyrylǵan – avtorlyq as mázirinen bastap jaıly monshaǵa deıin. Tabıǵat tynyshtyǵy men romantıkany unatatyndar úshin taptyrmas tańdaý.
OMIR Glamping (Aqtaý)
Kaspıı teńiziniń jaǵalaýynda ornalasqan bul erekshe glempıng etnıkalyq naqysh pen zamanaýı mınımalızmdi tamasha ushtastyrǵan. Úıler qazaq mádenıetine tán elementtermen bezendirilgen, al panoramalyq terezeler ár tańdy umytylmastaı qarsy alýǵa múmkindik beredi. Jaılylyqty, maǵynaly sátterdi jáne tabıǵatpen úndestikte bolýdy baǵalaıtyndar úshin minsiz oryn.
Tenir Eco Hotel (Shymbulaq, Almaty)
Teńiz deńgeıinen 3200 metr bıiktikte ornalasqan glempıngke tek aspaly jol arqyly jetýge bolady. Munda panoramalyq terezeler taýdyń keremet kórinisin tamashalaýǵa múmkindik beredi. Ski-in/ski-out formaty qysqy sport túrlerin unatatyndar úshin naǵyz jumaq meken.
Aspen Eco Hotel (Býrabaı)
Kúmbez pishinindegi úıler Býrabaıdyń qylqan japyraqty ormany ishinde ornalasqan. Jyly eden, zamanaýı jaǵdaı jáne panoramalyq kórinister tynysh ári jaıly demalysty qamtamasyz etedi. Munda taza aýada tynyǵyp, orman ishinde serýendep, kúsh jınaýǵa bolady. Qalanyń kúıbeń tirshiligin bir sát umytyp, ońasha demalysty qalaıtyndarǵa arnalǵan tamasha meken.
Charyn Canyon Camp (Sharyn shatqaly)
Elimizdiń eń kórnekti tabıǵı nysandarynyń biriniń janynda ornalasqan bul glempıng – shytyrman oqıǵaly demalysty súıetinderge arnalǵan. Keshki alaý janyndaǵy otyrystar, juldyzdy aspan astyndaǵy tynyshtyq pen shatqal boıyndaǵy serýender demalýshylarǵa umytylmas áser syılaıdy.
Aıta keteıik, Qazaqstanda týrızm mamandyǵyn oqytý formaty ózgerdi.