Qazaqstanda turǵyn úılerdiń 65 paıyzy Eýropaǵa qaraǵanda energııany 2-3 ese kóp paıdalanady - BUU Damý Baǵdarlamasy jobasynyń menedjeri
ASTANA. 4 sáýir. QazAqparat - Qazaqstanda turǵyn úı ǵımarattarynyń shamamen 65 paıyzy Eýropaǵa qaraǵanda energııany 2-3 ese kóp paıdalanady.
Bul týraly búgin Astanada «Energoaýdıt jáne energomenedjment - elimizdiń energetıkalyq turaqty damýynyń bóligi» atty ǵylymı-praktıkalyq konferentsııada BUU Damý Baǵdarlamasy jobasynyń menedjeri Baıan Ábilqaıyrova málim etti.
«Elimizdegi turǵyn úı ǵımarattarynyń 65 paıyzy Eýropaǵa qaraǵanda energııany 2-3 ese kóp paıdalanady. Al qazirgi tańda Qazaqstandaǵy turǵyn úı qory 271 mln. sharshymetrdi qurap otyr»,- dedi BUU DB menedjeri.
Onyń aıtýyna qaraǵanda, BUU Damý Baǵdarlamasy energetıkalyq tıimdilik naryǵynda birqatar jyldar boıy qyzmet etip keledi. Ondaǵy maqsat memleketterge tehnıkalyq qoldaý kórsetip, aldyńǵy qatarly halyqaralyq tájirıbelerdi keńinen taratý bolyp tabylady. Bul rette ornyqty energetıkalyq damý boıynsha BUU tarapynan Qazaqstan memlekettik organdaryna birqatar usynystar jasalǵan.
Onyń ishinde BUU DB qurylys salý barysynda energetıkalyq tıimdilikti baqylaýdy júrgizip, ony kúsheıtýdi usynady.
Budan ózge, energııa tutynýmen jasyl markalaý qoldaný jáne energetıkalyq tıimdilik pen ekologııalyq taza materıaldardy esepke ala otyryp salynatyn jasyl turǵyn úı týraly usynystar da barshylyq.
