Qazaqstanda turǵyn úı qurylysynda biryńǵaı operator qurylady
NUR-SULTAN. QazAqparat – Parlament Senatynyń jalpy otyrysynda «Qazaqstan Respýblıkasynyń keıbir zańnamalyq aktilerine turǵyn úı baǵdarlamalary operatorlarynyń sanyn qysqartý máseleleri boıynsha ózgerister men tolyqtyrýlar engizý týraly» Zańy eki oqylymda qaralyp, qabyldandy, dep habarlaıdy QazAqparat tilshisi.
Zań jobasy Qazaqstan Prezıdenti Qasym-Jomart Toqaevtyń Qazaqstan halqyna Joldaýyn turǵyn úı baǵdarlamalary operatorlarynyń sanyn qysqartý boıynsha iske asyrý maqsatynda ázirlengen.
«2000 jyldan jumys istep kelgen «Qazaqstan ıpotekalyq kompanııasy» AQ-nyń negizgi mindeti - ıpotekalyq oblıgatsııalardy shyǵarý arqyly ekinshi deńgeıdegi bankterdi qaıta qarjylandyrý. Osylaısha, ıpotekalyq qaryzdar boıynsha talap etý quqyqtaryn satyp alý jáne ıpotekalyq qaǵazdar shyǵarý ekinshi deńgeıdegi bankterge kredıt resýrstaryn tez qaıtarýdy jáne ótimdilikti, sondaı-aq ıpotekalyq kredıtterdiń el azamattaryna qoljetimdiligin qamtamasyz etti», - dedi senator Álimjan Qurtaev.
Sonymen qatar, ol 2008 jyly qurylys salasy úshin qarjy resýrstarynyń qoljetimdiligin qamtamasyz etý maqsatynda «Báıterek development» AQ qurylǵanyn eske saldy. Búginde «Báıterek developmen» AQ negizgi qyzmeti revolverlik qarjylandyrý qaǵıdaty boıynsha jergilikti atqarýshy organdardyń oblıgatsııalaryn satyp alý tetigi arqyly «Nurly jer» turǵyn úı-kommýnaldyq damýynyń memlekettik baǵdarlamasy aıasynda jalǵa beriletin jáne kredıttik turǵyn úı qurylysyn qarjylandyrýǵa arnalǵan. Bul qosymsha resýrstar bólmeı jańa qurylysty júzege asyrýǵa múmkindik beredi.
«2016 jyly turǵyn úı qurylysyndaǵy úlestik salymdardyń saqtalýyn qamtamasyz etý maqsatynda «Turǵyn úı qurylysyna kepildik berý qory» AQ qurylǵan. «Turǵyn úı qurylysyna kepildik berý qory» AQ negizgi qyzmeti - turǵyn úı qurylysyn aıaqtaýǵa kepildik berý. 2017-2019 jyldary kepildik mindettemeler kólemi 154,7 mlrd teńgeni qurady», - dedi depýtat.
Onyń atap ótýinshe, zań jobasy «Báıterek» ulttyq basqarýshy holdıngi» AQ kórsetilgen enshiles uıymdarynyń qyzmetin biriktirýge, sondaı-aq búgingi kúni iske asyrylyp jatqan «Damý» AQ qurylys salýshylardy sýbsıdııalaý quralyn biriktirýge, qaıtalanatyn fýnktsııalardy alyp tastaýǵa jáne jalpy ákimshilik shyǵystardy qysqartýǵa baǵyttalǵan.
Atap aıtqanda, turǵyn úı baǵdarlamalarynyń úsh operatoryn biriktirý eskerilgen.
Sonymen qatar, zań jobasymen Biryńǵaı operatordyń kelesi qyzmetteri retteledi: jergilikti atqarýshy organnyń (JAO) ýákiletti uıymdaryna, sondaı-aq memlekettik baǵdarlamalar aıasynda qurylys salýshylarǵa kredıt berý; jeke qurylys salýshylardyń kredıtterin sýbsıdııalaý.
Munymen qosa, biryńǵaı operatordyń kelesi qyzmetteri bekitiledi: JAO oblıgatsııalaryn satyp alý tetigi arqyly qarjylandyrýdy qosa alǵanda, turǵyn úı qurylysyn qarjylandyrý jáne ınvestıtsııalyq jobalardy iske asyrý; qurylysty aıaqtaýǵa kepildik berý arqyly halyqtyń úlestik salymdarynyń saqtalýyn qamtamasyz etý; keıinnen satyp alý quqyǵymen jalǵa beriletin turǵyn úı berý.
«Zańdy qabyldaý nátıjesinde Biryńǵaı operator ıpotekalyq kredıt berý jáne jalǵa beriletin turǵyn úı berý, úlestik turǵyn úı qurylysyn damytý tetikteri, sondaı-aq qurylys salasy úshin qarjy resýrstarynyń qoljetimdiligin qamtamasyz etý arqyly el halqyna turǵyn úıdiń qoljetimdiligin qamtamasyz etý salasyndaǵy memlekettik saıasatty iske asyratyn bolady. Zań jobasy bıýdjetten qarjy shyǵyndaryn talap etpeıdi jáne teris quqyqtyq ári áleýmettik-ekonomıkalyq saldarǵa ákep soqpaıdy», - dedi Á. Qurtaev.
Budan buryn habarlanǵandaı, atalǵan qujat bıyl sáýir aıynda Parlament Májilisinde maquldandy.
Zań jobasy turǵyn úı baǵdarlamalarynyń jumys istep turǵan operatorlary «Qazaqstan ıpotekalyq kompanııasy» AQ-ny, «Báıterek development» AQ men «Turǵyn úı qurylysyna kepildik berý qory» AQ-ny Turǵyn úı qurylysynyń biryńǵaı operatory etip biriktirýge baǵyttalǵan.
