Qazaqstanda turǵyn úı qurylysy toqtamaıdy
ASTANA. QazAqparat - Qazaqstandaǵy jas otbasylar, bıýdjettik mekeme qyzmetkerleri jáne halyqtyń áleýmettik jaǵynan az qorǵalǵan bóligi «Nurly jol» memlekettik baǵdarlamasynyń negizgi baǵyttary boıynsha jańa baspanaǵa qol jetkize alady. Bul týraly Ortalyq kommýnıkatsııalar qyzmetindegi baspasóz máslıhatynda Ulttyq ekonomıka mınıstriniń orynbasary Qaıyrbek Óskenbaev málimdeme jasady. Quzyretti mınıstrlik ókili qalyptasqan ekonomıkalyq ahýalǵa qaramastan, memleket áleýmettik turǵyn úı qurylysyn toqtatpaıtynyn habarlady.
Sonyń birinshisi - baspana alýǵa kezekte turǵandarǵa jalǵa beriletin páterlerdi salý. Ulttyq ekonomıka mınıstriniń orynbasary 2015 jyldyń sońyna deıin elimizde 115 myń sharshy metr jaldamaly páterler paıdalanýǵa beriletinin málimdedi. Bul páterlerdi jergilik atqarýshy organdarda kezekte turǵandar men jas otbasylar alady. «Jalǵa beriletin baspana salý boıynsha biz eki baǵytta jumys istep jatyrmyz. Eń aldymen, jergilikti atqarýshy organdarda kezekte turǵan azamattar men jas otbasylar baspanamen qamtamasyz etiledi. Mysaly, bıyl 115 myń sharshy metr turǵyn úı salýdy josparlasaq, sonyń ishinde 101 myń sharshy metri paıdalanýǵa berildi. Bul - josparymyzdyń 88 paıyzy oryndaldy degen sóz. Jyldyń sońyna deıin qalǵan úılerdi salyp bitiremiz»,- dedi Q. Óskenbaev.
Vıtse-mınıstrdiń málimetine qaraǵanda, jergilikti atqarýshy organdarda qazir 337 112 adam turǵyn úıdiń kezeginde tur. Sonyń ishinde, 319-y - Uly Otan soǵysynyń qatysýshylary men múgedekteri, 47 613-i - jetim balalar, 143 414-i - áleýmettik ahýaly tómen toptardyń ókilderi, 143 610-y - memlekettik qyzmetkerler, bıýdjettik mekeme qyzmetkerleri, áskerı adamdar, 2 165-i - óz basyndaǵy jalǵyz baspanasy jaramsyz dep tabylǵan adamdar. Atap aıtarlyǵy, Astana men Almaty qalalarynda ár sharshy metrdiń quny - 120 myń teńgeni, qalǵan óńirlerde - 90 myń teńgeni quraıdy. «Jas otbasylar boıynsha bólek baǵdarlama bar. Mysaly, jas otbasy jańadan salynǵan baspanaǵa qonystana alady. Jáne ol jalǵa alǵan páterinde 8 jylǵa deıin turýǵa jáne óziniń úıin tolyǵymen satyp alýǵa qajetti qarajatty jınaýǵa quqyly. Eger de jınaǵan aqshasy úıdi satyp alýǵa jetpese, «Turǵynúıqurylysjınaqbankinen» 15 jylǵa jyldyq 4 paıyzdyq mólsherlememen nesıe alady»,- dep túsindirdi vıtse-mınıstr.
Sonymen qatar, elimizdegi úleskerler máselesi de oń sheshiletini belgili boldy. Q. Óskenbaev bul máseleni Ulttyq ekonomıka mınıstrligi qatań baqylaýda ustap otyrǵanyn jetkizdi. Onyń aıtýynsha, 2015 jyldyń sońyna deıin úlestik qatysý arqyly salynyp jatqan 9 nysannyń qurylysy aıaqtalady. Al, 2016 jyly qalǵan 5 nysan da tolyǵymen salynyp bitedi. Sóıtip, elimizdegi 1664 úlesker uzaq kúttirgen baspanasyna qol jetkizip, qonys toıyn toılaıdy. Vıtse-mınıstr úleskerler máselesiniń qalaı sheshilip jatqanyna naqty mysal keltirdi. Mysaly, Jambyl oblysyndaǵy «Atshabar» turǵyn úı kesheniniń qurylysyn aıaqtaýdy «Qazaqstannyń ıpotekalyq kompanııasy» AQ-y óz moınyna alǵan. Bul qurylys 2015 jyldyń sońynda paıdalanýǵa beriledi. Al Aqtaý qalasyndaǵy «Aqjelken» turǵyn úı kesheniniń qurylysyn aıaqtaıtyn ınvestor tabylǵan. Sondaı-aq, Astana qalasyndaǵy «Terrıtorııa komforta» turǵyn úı kesheni boıynsha jergilikti ákimdik isti qolyna alypty. Demek, ekonomıkalyq qıynshylyqtarǵa qaramastan, memleket qarapaıym qazaqstandyqtardyń ómir súrý jaǵdaılaryn jaqsartýǵa basymdyq berýde. Ámirlan Álimjan
