Qazaqstanda turǵyn úı qurylysy barysyn baqylaıtyn ahýaldyq ortalyq quryldy

NUR-SULTAN. QazAqparat – Elimizde turǵyn úı qurylysy barysyn baqylap, monıtorıng júrgizetin arnaıy ahýaldyq ortalyq quryldy. Bul týraly QR Indýstrııa jáne ınfraqurylymdyq damý mınıstrliginiń birinshi vıtse-mınıstri Qaıyrbek Óskenbaev málim etti, dep habarlaıdy QazAqparat tilshisi.

«Qazaqstan turǵyn úı kompanııasy» AQ oblıgatsııalardy satyp alý mehanızmi arqyly ákimdikterge qarjylandyrýdy usyný, sondaı-aq turǵyn úılerdiń salý barysyna monıtorıng júrgizý fýnktsııalary berilgen «Nurly jer» memlekettik baǵdarlamasynyń qarjy operatory. Osy fýnktsııany oryndaý aıasynda Qazaqstan turǵyn úı kompanııasymen birlesip, zamanaýı tehnıkalyq baqylaý quraldaryn qoldana otyryp, barlyq obektilerge qashyqtyqtan monıtorıng júrgizýge múmkindik beretin ahýaldyq ortalyq quryldy. Ahýaldyq ortalyqtyń jumys isteý prıntsıpine kelsek, ákimdiktiń qyzmetkerleri portaldaǵy jeke kabınet arqyly apta saıyn óńirlerde jyljymaıtyn turǵyn úı obektileriniń qurylysy barysy, daıyn turǵyn úıdi qarjylandyrý, qarjyny ıgerý jáne satý kólemi týraly ózekti aqparatty ornalastyrady», - dedi Q. Óskenbaev baspasóz máslıhatynda.

Onyń málimdeýinshe, endigi ýaqytta kez kelgen azamat «Nurly jer» baǵdarlamasy aıasynda el boıynsha turǵyn úı qurylysynyń barysy týraly aqparatqa qol jetkize alady.

«Ahýaldyq ortalyq saıtynyń «Aqparat» bóliminde jobanyń ataýy, bas merdiger, jobanyń quny, qarajattyń ıgerilý somasy týraly derekter, sondaı-aq qurylys jumystarynyń bastalýy men aıaqtalýynyń josparly jáne naqty kúnderi kórsetiledi. Al «Qurylys barysy» bóliminde qurylys jumystarynyń kestesi kórsetilgen. Budan ári, «Sýret / Beıne» bóliminde qurylys nysanynyń sýretteri men beınejazbany kórýge bolady. Jáne «Geolokatsııa» bóliminde kartada sol qurylys obektisiniń ornalasqan jeri kórsetiledi», - deıdi ol.

Vıtse-mınıstrdiń sózinshe, búginde ákimdikter ahýaldyq ortalyq júıesinde 3 188-den astam nysandy satý týraly aqparat engizdi, onyń 824-i turǵyn úı.