Qazaqstanda turǵyn úı-kommýnaldyq sharýashylyq salasy reformalanady
Qordalanǵan máselelerdi sheshý maqsatynda turǵyn úı-kommýnaldyq sharýashylyǵyn reformalaý boıynsha arnaıy jumys toby qurylǵan.
«Búginde páter ıeleri men basqarý organdarynyń ózara qarym-qatynasy ózekti másele bolyp otyr. Saldarynan bul salada kóptegen ózekti máseleler qordalanyp jatyr. Máselen, aǵymdaǵy jınaq shotynyń bolmaýy, basqarý organdary qyzmetiniń aıqyndalmaýy, úı-jaı ıeleriniń basqarýshy organǵa senbeýi, turǵyn-úı ınspektsııasy organdarynyń ókilettikteriniń tolyq kólemde bolmaýy, basqarý organdarynyń negizgi mindetteriniń zańda kórsetilmeýi, basqarý organdary jetekshilerin óz qyzmetterinen bosatý máselesi», - dedi «Turǵyn úı kommýnaldyq sharýashylyǵyn jańǵyrtý men damytýdyń qazaqstandyq ortalyǵy» AQ Turǵyn úı sharýashylyǵy departamentiniń dırektory Mádına Mýrsakına Astanada ótken «TKSh-EKSPO 2017» halyqaralyq forýmynda.
Onyń aıtýynsha, dál osy máselelerdiń birneshe jyldan beri sheshilmeı kelýi azamattardyń narazylyǵyn týǵyzyp otyr. Odan bólek, kóptegen basqarý organdary men páter ıeleri qazirgi zańnamadaǵy normalardy saqtamaıdy. Osyǵan oraı, Turǵyn úı sharýashylyǵyn reformalaý boıynsha arnaıy tujyrymdama jobasy ázirlengen.
«Memleket basshysy men Premer-Mınıstrdiń tapsyrmalaryna jáne Parlament Májilisiniń usynystaryna sáıkes, Turǵyn úı-kommýnaldyq sharýashylyǵyn reformalaý boıynsha tujyrymdama jobasy ázirlengen. Jobany mekemearalyq komıssııa maquldady jáne Investıtsııalar jáne damý mınıstrligi janynan jumys toby quryldy. Jumys tobyna páter ıeleri kooperavtıvi qaýymdastyqtarynyń, óńirler men túrli mekemelerdiń jáne basqarýshy kompanııalardyń sarapshylary endi», - dep atap ótti sarapshy.
M.Mýrsakınanyń málimdeýinshe, atalǵan reforma úsh negizgi baǵyt boıynsha júrgiziledi.
«Birinshi baǵyt - basqarý organdarynyń qyzmetin jáne ortaq nysandy ustaý, rásimdeý tártibin retteý. Ekinshisi - jergilikti atqarý organdarynyń turǵyn úı ınspektsııasy qyzmetiniń rólin kúsheıtý jáne úshinshi baǵyt - turǵyn úı jáne turǵyn úı-qurylys kooperatıvteriniń qyzmetin uıymdastyrýdy jetildirý», - dedi ol.
Sarapshy keltirgen derekterge sáıkes, jergilikti atqarý organdary Qazaqstanda 78 402 kóp páterli turǵyn úıdiń bar ekenin habarlaǵan. Biraq, resmı statıstıkalyq málimetter boıynsha, bul kórsetkish aıtarlyqtaı kóbirek: 20 páterge deıingi kópqabatty turǵyn úıler sany - 270 myń, al 20 páterden joǵary úıler - 33 myń.
«Elimizdiń kóp páterli baspana qoryndaǵy 52 myń úı qalypty jaǵdaıda, 3% - apatty jaǵdaıda jáne 26% - kúrdeli jóndeý júrgizýdi qajet etedi», - dep óz sózin tolyqtyrdy sarapshy.
Aıta keteıik, Qazaqstanda 2011 jyldan bastap turǵyn úı-kommýnaldyq sharýashylyqty jańǵyrtý baǵdarlamasy júzege asyryldy. Baǵdarlama aıasynda kóp qabatty turǵyn úılerge kúrdeli jóndeý jumystaryn júrgizýge qarajat bólindi.
«Shamamen 33,5 mlrd teńge bólinip, 2 669 úı - jalpy turǵyn úı qorynyń 3,4 paıyzy ǵana kúrdeli jóndeýden ótti. Sonymen birge, bizdiń zańda (QR Turǵyn úı qatynastary týraly Zańy) páter ıeleriniń 0,02 AEK kóleminde jınaq shotyna aqsha jınaý qajettigi kórsetilgen. Alaıda, atalǵan norma iske asyrylyp jatqan joq jáne arnaıy qurylǵan jumys toby bul normany qaıta qaraıdy», - deıdi M.Mýrsakına.
