Qazaqstanda turǵyn-úı kommýnaldyq sharýashylyǵy boıynsha jańa reforma ázirlenýde
Búgin QR Investıtsııalar jáne damý mınıstrligine qarasty Qurylys salasyn jáne turǵyn-úı kommýnaldyq sharýashylyǵyn damytý departamentiniń dırektory Marǵulan Ábdikárimov baspasóz máslıhatynda Qazaqstanda turǵyn- úı kommýnaldyq sharýashylyǵyna qatysty zańǵa tıisti túzetýler engiziletini jaıly málim etti.
Onyń aıtýynsha, engizilgen ózgeristerdi depýtattar maquldap zań jobasy kúshine ense, onda páter ıeleriniń kooperatıvi ótkenniń isi bolyp qalady. Onyń ornyna jańadan kommertsııalyq emes uıym - múlikti menshikteýshiler birlestigi qurylady. Jáne ol bir úı- bir múlikti menshikteýshiler birlestigi- bir esep qaǵıdasy boıynsha jumys jasaıdy.
«Memlekettik organdar men basqaratyn kompanııalardyń, servıstik qyzmet sýbektileriniń, atqarýshy organdar men kópqabatty turǵyn úı múlkin menshikteýshilerdiń quqyqtary men mindetteri jáne jaýapkershilikteri retteletin bolady. Usynylǵan qaǵıda boıynsha árbir úıdi basqarýdy jeke tásilde júrgizý qarastyrylǵan. Árbir MMB jeke aǵymdaǵy jáne jınaqtaý esebin ashatyn bolady. Odan bólek tirkelgen kondomınıýmdar sany uıaǵaıyp, servıstik kompanııalardyń damýynyń alǵysharty qurylady», - dedi Marǵulan Ábdikárimov.
Sonymen qatar, M.Ábdikárimov páter ıeleri úıdi basqarýda ózderine qolaıly dep tapqan úlgisin tańdaı alatynyn da aıtyp ótti. Eger bir turǵyn úıdegi páterdiń sany 10-nan aspasa onda JShS qurylatyn bolady, al 10-nan artyq páter bolǵan jaǵdaıda múlikti menshikteýshiler birlestigi qurylady jáne oǵan turǵyndardyń ishinen basqarma tóraǵasy saılanady.
«Eger tóraǵalyq qyzmetke adam tabylmaǵan jaǵdaıda, MMB jeke tulǵanyń qyzmetin paıdalanyp, ıaǵnı menedjerdi jaldaıdy. Onyń jumysyn TKSh-nyń biryńǵaı aqparattyq júıesi arqyly baqylaý múmkindigi bolady.Osy turǵyda aıtyp ótken jón, búginde atalǵan qyzmetti páter ıeleriniń kooperatıvteri júrgizedi jáne olardyń qyzmetiniń ashyqtyǵy men qyzmet kórsetý sapasyna qatysty kóp syn aıtylýda», - dedi ol.
Mınıstrlik atalǵan zań jobasyn Májilis depýtattarynyń qaraýyna osy aıda jiberýdi josparlaýda.
