Qazaqstanda turǵyn úı baǵasy arzandady
ALMATY. QazAqparat - 2016 jyldyń shildesinde Qazaqstanda jyljymaıtyn múlik baǵasynyń tómendeýi baıqaldy.
Aldyńǵy maýsym aıymen salystyrǵanda jańa turǵyn úı baǵasy 0,2 paıyzǵa, paıdalanýǵa berilgen turǵyn úı baǵasy 0,5 paıyzǵa tómendedi, dep habarlady ranking.kz.
«Shildede jańa páterlerdiń baǵasy sharshy metrine 252,2 myń teńgeni qurasa, odan sanaty tómen úılerdiń quny 191,3 myń teńge boldy. Jańa jáne qoldanystaǵy turǵyn úı arasyndaǵy baǵa aıyrmashylyǵy - 24 paıyz», delingen sarapshylar málimetinde.
Aımaqtar arasynda, jańa úı qurylysynyń eń joǵarǵy baǵasy ShQO-da tamyz aıynda tirkelip otyr (bir sharshy metri úshin 361,6 myń teńge. Qazaqstan boıynsha ortasha kórsetkishten 43,4 paıyzǵa joǵary). Ekinshi orynda Astana qalasy bolsa (bir sharshy metri úshin 341,7 myń teńge), «qymbat úshtikti» Atyraý tuıyqtap otyr. Onda páter sharshy metrine 322,6 myń teńge turady.
2015 jyldyń tamyzymen salystyrǵanda bıylǵy jazdyń sońǵy aıynda jańa úılerdiń baǵasy Astana qalasy (+18,4 paıyz) men Pavlodar oblysynda (+17,2 paıyz) kóterilgen. Jambyl, Qyzylorda, Qaraǵandy, Almaty oblystarynda jańa páter baǵasy ózgergen joq. Al, OQO, SQO, BQO, Aqtóbe jáne Aqmola oblystarynda turǵyn úı arzandaǵan.
Kóppáterli turǵyn úılerdi satý-satyp alý boıynsha jasalǵan kelisimder aldyńǵy aıǵa qaraǵanda 11 paıyzǵa tómen (9 826 kelisim jasalǵan). Sonymen qatar, 2016 jyldyń maýsym aıymen salystyrǵanda jeke turǵyn úılerdiń satylýy da 8 paıyzǵa túskenin kórsetip otyr (5 630 kelisim jasalǵan).
