Qazaqstanda turǵyn úılerdi tabıǵı apattardan mindetti saqtandyrý engizilmek
ASTANA. KAZINFORM – Qazaqstanda turǵyn úılerdi jer silkinisi, sý tasqyny jáne orman órtinen mindetti saqtandyrýdy kezeń-kezeńimen engizý josparlanyp otyr, dep málimdedi Qarjy naryǵyn retteý jáne damytý agenttigi.
Bul bastama Qazaqstan Respýblıkasynyń saqtandyrý naryǵyn damytýdyń 2026-2030 jyldarǵa arnalǵan baǵdarlamasynda qarastyrylǵan. Qujat 30 qazanda Qarjy naryǵyn retteý jáne damytý agenttigi men Ulttyq Bank basqarmalarynyń birlesken qaýlysymen bekitildi.
Baǵdarlama Memleket basshysynyń 2026 jylǵy 10 aqpandaǵy Úkimettiń keńeıtilgen otyrysynda bergen tapsyrmasyn oryndaý maqsatynda ázirlengen.
Jańa qujatta saqtandyrýdyń 8 mindetti synyby men 10 júktelgen túri úshin biryńǵaı retteý rejımin qalyptastyrý kózdelgen.
Turǵyn úılerdi tabıǵı apattardan mindetti saqtandyrý júıesi aldymen daıyndyq kezeńinen ótip, keıin 3 oblysta pılottyq rejımde iske qosylady. Odan soń apat qaýpi joǵary 16 oblysqa keńeıtiledi.
Júıe tabıǵı apat saldarynan baspanasy búlingen nemese qıraǵan azamattarǵa qarjylyq qoldaý kórsetýge baǵyttalǵan.
– Baǵdarlamanyń basty mindeti – saqtandyrýdy azamattar men kásipkerlerdi qorǵaýdyń naqty jáne qoljetimdi quralyna aınaldyrý. Saqtandyrý otbasyna kútpegen shyǵyndardy eńserýge, turǵyn úı men jınaqtardy saqtaýǵa jáne bızneske úlken táýekelder týyndaǵan kezde de jumysyn jalǵastyrýǵa kómektesýi kerek. Ol úshin Baǵdarlama saqtandyrý qyzmetteriniń sapasyn arttyrýdy, ónimderdi tańdaýdy keńeıtýdi, tólemderdi alýdy jeńildetýdi jáne tutynýshylardyń quqyqtaryn qorǵaýdy kúsheıtýdi kózdeıdi, – delingen agenttik aqparatynda.
Resmı málimetke sáıkes, sońǵy bes jylda elimizdegi saqtandyrý uıymdarynyń aktıvteri eki eseden astam ósip, 1,8 trln teńgeden 3,9 trln teńgege jetken.
Osy kezeńde saqtandyrý syılyqaqylarynyń kólemi 815 mlrd teńgeden 1,9 trln teńgege, al saqtandyrý tólemderi 127 mlrd teńgeden 461 mlrd teńgege deıin ulǵaıdy. Degenmen saqtandyrýshylar aktıvteriniń jalpy ishki ónimdegi úlesi shamamen 2,7% deńgeıinde qalyp otyr.
Jalpy baǵdarlama 6 strategııalyq baǵyt boıynsha 18 bastamany qamtıdy.
Olardyń qatarynda erikti medıtsınalyq saqtandyrýdy damytý, zeınetkerlik annýıtetterdiń jańa túrlerin engizý, saqtandyrý qyzmetterin tsıfrlandyrý jáne tutynýshylardyń quqyqtaryn qorǵaýdy kúsheıtý bar.
Atap aıtqanda, azamattarǵa erikti saqtandyrý sharttaryn elektrondyq túrde rásimdeý jáne saqtandyrý jaǵdaılaryn onlaın retteý múmkindikterin keńeıtý josparlanǵan.
Sonymen qatar saqtandyrý marketpleısterin damytý, deldaldardyń qyzmetin retteý jáne saqtandyrý alaıaqtyǵyna qarsy kúresti kúsheıtý kózdelip otyr.
Shaǵyn jáne orta bıznes úshin kútpegen shyǵyndar men qyzmettiń toqtap qalýyna baılanysty táýekelderdi saqtandyrýdyń jańa sheshimderi ázirlenbek.
Baǵdarlama aıasynda ıslamdyq saqtandyrý ónimderin, onyń ishinde takafýl júıesin damytý da qarastyrylǵan.
Qarjy naryǵyn retteý jáne damytý agenttiginiń málimetinshe, 18 strategııalyq bastamanyń 12-sin «Saqtandyrý naryǵy týraly» jańa zań jobasy arqyly iske asyrý kózdelgen. Qujatty jyl sońyna deıin Quryltaıdyń qaraýyna engizý josparlanyp otyr.
Aıta keteıik, buǵan deıin turǵyn úılerdi tabıǵı apattardan mindetti saqtandyrýdyń alǵashqy sharttary jarııalanǵan bolatyn. Usynylǵan tetik boıynsha saqtandyrýdyń jyldyq jarnasy baspana ornalasqan óńirdegi tabıǵı apat qaýpine qaraı belgilenýi múmkin.
