Qazaqstanda turǵyn úıdi satý boıynsha pılottyq joba engizildi
ASTANA. KAZINFORM – «Tsıfrlyq ıpoteka» ulttyq jobasy sheńberinde Qazaqstanda ekinshi dárejedegi turǵyn úıdi satyp alý jáne satý boıynsha notarıattyq mámilelerdi onlaın-resimdeýdiń pılottyq tetigi engizildi.
Ádilet mınıstrliginiń málimetinshe, endi azamattarǵa bankke jáne notarıýsqa baryp ýaqyt jumsaýdyń qajeti joq. Barlyq kezeńderdi qashyqtan, elektrondyq formatta ótýge bolady.
Bul qalaı jumys isteıdi?
Ipotekalyq qaryzdy paıdalana otyryp, turǵyn úı satyp alǵandar úshin «tsıfrlyq ıpoteka» servısi ótinim berýden bastap tirkeý týraly qujattardy alýǵa deıin mámileni tolyǵymen onlaın resimdeýge múmkindik beredi. Protsestiń barlyq qatysýshylary - bank, notarıýs jáne tirkeýshi organdar - qaǵaz qujat aınalymyn boldyrmaıtyn biryńǵaı tsıfrlyq platforma arqyly ózara is-qımyl jasaıdy.
Mámileniń eki taraby da júıede avtorızatsııadan ótedi jáne óz áreketterin elektrondyq tsıfrlyq qoltańba (ETsQ) kómegimen rastaıdy. Júıe avtomatty túrde:
• qatysýshylardyń jeke basyn;
• obektige menshik quqyǵynyń bolýyn;
* quqyqtyq kedergiler, menshikke buǵattyń salynbaýy nemese basqa shekteýlerdiń bolmaýyn tekseredi.
Notarıýs mámileni beınebaılanys arqyly onlaın-formatta kýálandyrady. Osydan keıin sharttyń elektrondyq kóshirmesi tirkeý úshin «Jyljymaıtyn múliktiń biryńǵaı memlekettik kadastry» aqparattyq júıesine jiberiledi. Múliktiń jańa ıesi protsedýranyń aıaqtalǵany týraly habarlama alady.
Nelikten qaýipsiz?
• Barlyq is-áreketter jeke qoltańbamen birdeı zańdy kúshi bar ETsQ-men rastalady.
• Servıs qujattardy qoldan jasaý nemese alaıaqtyq mámileler jasaý múmkindigin boldyrmaıtyn memlekettik derekqorlarmen biriktirilgen.
• Mámile kóp satyly tekserýden ótedi: júıe qatysýshylardyń jáne obektiniń derekterin avtomatty túrde tekseredi, sonymen qatar barlyq áreketterdi elektrondy jýrnalǵa jazady.
• Mámilege qatysýshylar ár kezeńde habarlama alady, al qujattar qorǵalǵan tsıfrlyq muraǵatta saqtalady.
Azamattarǵa yńǵaıly
• Endi kezekte turýdyń jáne kóptegen qaǵaz qujattardy jınaýdyń qajeti joq.
• Protsess aıqyn, jyldam jáne yńǵaıly bolady.
• Barlyq qujattar onlaın rejıminde qol jetimdi jáne tolyq zańdy kúshke ıe.
• Ipotekany rásimdeý kezinde búkil protsess tsıfrlandyrý esebinen áldeqaıda jyldam ótedi.
Elektrondyq resimdeý servısteri men «tsıfrlyq ıpoteka» ekinshi deńgeıdegi bankterdiń platformalarynda kezeń-kezeńimen engizilip, halyq arasynda belsendi júrgiziletin bolady. Bul jyljymaıtyn múlikti satyp alý protsesin ár azamat úshin odan da qoljetimdi jáne qaýipsiz etýge múmkindik beredi.
Aıta keteıik, 2025 jyly elimizde barlyq qarajat kózderi esebinen 19,2 mln sharshy metr turǵyn úı nemese 176-nan astam páter salý josparlanǵan.