Qazaqstanda turǵyn úı sapasynyń biryńǵaı standartyn engizý usynyldy
ASTANA. KAZINFORM – Búgin Quryltaıdyń jalpy otyrysynda depýtat Maqsut Nasıbýlov qalalar men eldi mekenderde turǵyn úı sapasynyń biryńǵaı standartyn engizý jóninde depýtattyq saýalyn jarııalady.
- Atap aıtqanda balalar úshin oıyn alańdary, sportpen aınalysyp, serýendeıtin alańdar, qart adamdar men múmkindigi shekteýli jandar úshin arnaıy demalys oryndary syndy qolaıly orta qalyptastyrý máselesi nazardan tys qalatynyn baıqadyq. Osy másele aýdan ortalyqtary men aýyldyq eldi mekenderde ótkir tur, - dedi Maqsut Nasıbýlov Úkimet basshysynyń atyna joldaǵan saýalynda.
Onyń paıymynsha, memleket qarjysy esebinen salynatyn, sondaı-aq ózge de qarajat kózderi arqyly boı kóteretin turǵyn úıdiń sapasyna qoıylatyn biryńǵaı eń tómengi sapa standartyn belgileý qajet.
- Jańa turǵyn úılerdi jobalaý kezinde tek ǵımarattyń ózin ǵana emes, sonymen qatar qajetti ınfraqurylym men abattandyrý elementterin de aldyn ala qarastyrý qajet. Atap aıtqanda, aýmaqty abattandyrý, jaryqtandyrý, jaıaý júrginshiler joldary, kógaldandyrý, balalar jáne sport alańdary, demalys oryndary jobada mindetti túrde eskerilýi tıis. Sonymen qatar, buǵan deıin salynǵan memlekettik turǵyn úılerge tekserý júrgizý qajet. Jobalaý-smetalyq qujattamada kózdelgen talaptardy naqty oryndalǵan jumystarmen salystyrý kerek, - dedi depýtat.
Onyń sózine qaraǵanda, bul standart tek Astana nemese oblys ortalyqtarynda ǵana emes, aýdan ortalyqtary men aýyldarda da qoldanylýy kerek. Bul rette ár eldi mekenniń erekshelikterin eskerý mańyzdy.
- Biz aýylǵa qalalyq úlgini sol kúıinde kóshirýdi usynbaımyz. Bizdiń maqsatymyz - ár adamǵa laıyqty ómir súrýdiń biryńǵaı bazalyq deńgeıin qamtamasyz etý – dedi Maqsut Nasıbýlov.
Aıta keteıik, jaqynda Premer-mınıstr turǵyn úıdiń bastapqy jarnasyn tómendetý tetikterin ázirleýdi tapsyrdy.
