Qazaqstanda turǵyn úı baǵasy bir jylda qalaı ózgerdi
ASTANA. KAZINFORM – 2025 jyly Qazaqstandaǵy jyljymaıtyn múlik naryǵynda belsendilik joǵary bolyp, turǵyn úı baǵasy jyl qorytyndysy boıynsha 15% ósti. Bul týraly Ulttyq banktiń qarjy jáne naqty aktıvter naryǵyn taldaý basqarmasynyń basshysy Talǵat Jarqynbaı Ulttyq banktiń saraptamalyq-taldamalyq pikirtalas klýbynyń otyrysynda aıtty.
Onyń aıtýynsha, 2025 jyly jyljymaıtyn múlik naryǵynda belsendilik joǵary deńgeıde saqtaldy. Nátıjesinde eki naryqta da, ıaǵnı bastapqy jáne qaıtalama turǵyn úı naryqtarynda, jyl qorytyndysy boıynsha baǵalar shamamen 15% ósken.
- 2025 jyly naryqtar jalpy belsendi boldy. Jyl qorytyndysy boıynsha eki naryqta da baǵalar 15%-ǵa ósti. 2026 jyldyń birinshi jartyjyldyǵynda ósim qarqyny birshama baıaýlaǵanymen, ol áli de ınflıatsııa deńgeıinen joǵary boldy, – dedi Talǵat Jarqynbaı.
Sonymen qatar 2026 jyldyń alǵashqy alty aıynda jyljymaıtyn múlik naryǵyndaǵy mámileler sany ótken jyldyń sáıkes kezeńimen salystyrǵanda birshama tómendegen.
- Eger naryqtaǵy belsendilikti satyp alý-satý mámileleri arqyly taldaıtyn bolsaq, 2026 jyldyń birinshi jartyjyldyǵynda mámileler sany 2025 jyldyń birinshi jartyjyldyǵymen salystyrǵanda birshama qysqardy, – dedi Ulttyq bank ókili.
Onyń málimetinshe, osy kezeńde jeńildetilgen ıpotekalyq baǵdarlamalar boıynsha nesıe berý kólemi, kerisinshe, artqan. 2026 jyldyń birinshi jartyjyldyǵynda jeńildetilgen ıpoteka berý kórsetkishi 2025 jyldyń sáıkes kezeńimen salystyrǵanda 27%-ǵa ósken.
Sonymen birge turǵyn úı jaǵdaıyn jaqsartý maqsatynda Biryńǵaı jınaqtaýshy zeınetaqy qorynan (BJZQ) qarajat alý kólemi de aıtarlyqtaı boldy.
- 2026 jyldyń birinshi jartyjyldyǵynda BJZQ-dan turǵyn úı jaǵdaıyn jaqsartýǵa shamamen 500 mlrd teńge alyndy, – dedi Talǵat Jarqynbaı.
Buǵan deıin turǵyn úı baǵasy men otbasy tabysy salystyrylatynyn jazǵanbyz.
