Qazaqstanda turatyn árbir azamat qazaq tilinde sóıleýi kerek - QR Prezıdentiniń atyna mektep oqýshysynan joldanǵan hattan
ANA. Qarashanyń 5-i. QazAqparat /Gúlmıra Álıakparova/ - Astana qalasyna orys tilin bilmeı bara almaısyz. Sebebi munda barlyǵy orys tilinde sóıleıdi - Elbasy N.Nazarbaevpen qarashanyń aldaǵy 13-i kúni bolatyn tikeleı efırge suraqtardy qabyldap jatqan www.line.gov.kz saıtyna mektep oqýshysynan osyndaı hat kelip tústi,
dep habarlaıdy QazAqparat.
Ońtústik Qazaqstan oblysy, Túlkibas aýdanyndaǵy M.V.Lomonosov atyndaǵy mekteptiń 8-shi synyp oqýshysy Gúlnár Tóregeldi memlekettik tildiń, ári óziniń ana tiliniń búgingi jaǵdaıyna alańdaýshylyǵyn bildirý úshin, Elbasynyń atyna qarashanyń 4-i kúni saǵat 21.39-da joldaǵan hatynda: «Qazaq tili - memlekettik tilimiz bolǵandyqtan, Qazaqstanda turatyn árbir azamat osy tilde sóıleýi kerek. Alaıda, elimizde memlekettik tildiń qoldanylý aıasynyń óte tar ekenin sózge tıek etkim keledi.Tipti, astanamyz Astana qalasyna orys tilin bilmeı bara almaısyz. Sebebi,munda barlyǵy orys tilinde sóılesedi. Ata Zańymyzda:"Orys tili qazaq tilimen qatar qoldanylady" dep jazylǵandyqtan, biz olarǵa qazaq tilinde sóıleńiz dep talap qoıa almaımyz. Keleshekte Qazaqstan álem elderiniń ishinde tek ekonomıkalyq damýymen emes, mádenı, rýhanı baılyǵymen erekshelense eken deımin. Al rýhanı baılyǵymyzdyń negizgi kórsetkishi - ana tilimiz. Sondyqtan Sizden memlekettik til máselesine kóp kóńil bólýińizdi suraımyn», degen.
