Qazaqstanda turaqty qonystanýǵa melekettik bajdy engizý usynyldy
ASTANA. QazAqparat - Qazaqstanda turaqty turǵylyqty jerge ruqsat berý úshin memlekettik bajdy engizý josparlanyp otyr. Bul týraly Zań jobalaý qyzmeti máseleleri jónindegi vedomstvoaralyq komıssııanyń kezekti otyrysynda zań jobasynyń tujyrymdamasyn tanystyrý kezinde QR Eńbek jáne halyqty áleýmettik qorǵaý vıtse-mınıstri Nurjan Áltaev málim etti, dep habarlaıdy QazAqparat tilshisi.
Búgin komıssııa otyrysynda «Qazaqstan Respýblıkasynyń keıbir zańnamalyq aktilerine kóshi-qon protsesterin retteý máseleleri boıynsha ózgerister men tolyqtyrýlar engizý týraly» zań jobasynyń tujyrymdamasy qarastyryldy.
«Kóshi-qon protsesterin retteý salasynda ókiletti memorgandar qyzmetiniń qajetti quqyqtyq negizin qurý úshin tıisti usynystar qarastyrylǵan. Birinshiden, Qazaqstan Respýblıkasynda turaqty turǵylyqty jerge ruqsat berý úshin memlekettik bajdy bekitý eskerilgen», - dedi N. Áltaev.
Sonymen qatar sheteldikterdi qabyldaý men berý boıynsha memlekettik organdardyń quzyretin naqtylaý usynylady.
Budan buryn habarlanǵandaı, atalǵan zań jobasynyń tujyrymdamasy aıasynda shetelde ómir súretin etnıkalyq qazaqtarǵa ruqsat qujattarynsyz Qazaqstan aýmaǵynda jumys isteý múmkindigin berý eskerilgen.
