Qazaqstanda sheteldikterdiń elde turaqty turýyna ruqsat berýdiń jańa tetigi engizilip jatyr
ASTANA. KAZINFORM - QR Eńbek jáne halyqty áleýmettik qorǵaý mınıstrligi ishki eńbek naryǵyn qorǵaý maqsatynda jyl saıyn jumys berýshilerdiń suranysyna sáıkes sheteldik jumys kúshin tartý kvotasyn belgilep, bóledi.
Mınıstrliktiń baspasóz qyzmetiniń habarlaýynsha, 2026 jylǵa arnalǵan sheteldik jumys kúshin tartý kvotasy 23,6 myń adamdy quraıdy, al eńbek ımmıgranttaryn tartý kvotasy 221,8 myń adam deńgeıinde aıqyndalǵan.
-Sonymen qatar eldiń ornyqty damýyn qamtamasyz etýge jáne Qazaqstanmen óz bolashaǵyn baılanystyratyn, ıaǵnı azamattyq alýǵa nıetti shetel azamattaryn qabyldaý sapasyn arttyrýǵa baǵyttalǵan kóshi-qon saıasaty júıeli túrde jetildirilip jatyr. Osyǵan baılanysty turaqty turýǵa ruqsat alý tetiginiń zamanaýı tsıfrlyq tásilder men ashyqtyq qaǵıdattaryna negizdelgen jańartylǵan tetigi engizilý ústinde, - delingen habarlaamada.
Jańa tártip úmitkerlerdi kezeń-kezeńimen baǵalaýdy kózdeıdi: memlekettik tildi bazalyq deńgeıde meńgerýin tekserý, saýalnamalyq derekterdi taldaý, tsıfrlyq skorıng, ýákiletti memlekettik organdar tarapynan tekserýler, sondaı-aq qorytyndy suhbat.
Bul tetik Qazaqstandy uzaq merzimge qonystanyp, qoǵam ómirine belsendi aralasatyn el retinde tańdaıtyn azamattarǵa baǵyttalǵan.
Atalǵan tásildi iske asyrý turaqty turýǵa nıetti adamdardy neǵurlym dál ári teńgerimdi qabyldaýdy qamtamasyz etip, kóshi-qon úderisteriniń tıimdiligin arttyrýǵa jáne áleýmettik turaqtylyqty nyǵaıtýǵa múmkindik beredi.
Qazaqstanda ınvestorlar men bıznes ókilderi úshin vıza rásimdeý jumystary jeńildegeni týraly jazdyq.
