Qazaqstanda turaqty turýǵa ruqsat alý úshin suhbattasý tártibi ózgerdi
ASTANA. KAZINFORM — Qazaqstanda turaqty turý úshin elge kelgen sheteldikter men azamattyǵy joq adamdarmen suhbat júrgizý tártibi ózgerdi. Endi vızasyz rejım qoldanylatyn memleketterdiń azamattarymen suhbatty arnaıy komıssııa ótkizedi.
Tıisti ózgerister Eńbek jáne halyqty áleýmettik qorǵaý, Іshki ister jáne Tsıfrlyq damý mınıstrleriniń birlesken buıryǵynda jazylǵan.
Jańa tártipke sáıkes, suhbatty ımmıgrant turaqty turýdy josparlaǵan óńirdegi halyqty áleýmettik qorǵaý jáne jumyspen qamtý salasyna jaýapty jergilikti atqarýshy organ ótkizedi. Ótinish berýshi saýalnamany portal arqyly toltyrǵanda ózi turaqty turatyn óńirdi kórsetedi.
Al vızasyz rejım qoldanylatyn memleketterdiń azamattary úshin arnaıy komıssııa qurylady. Onyń quramyna halyqty áleýmettik qorǵaý jáne jumyspen qamtý, mádenıet jáne ishki saıasat salalaryna jaýapty jergilikti atqarýshy organdardyń, ishki ister organdarynyń, sondaı-aq bilim salasynda sapany qamtamasyz etý komıtetiniń aýmaqtyq departamentteriniń ókilderi kiredi.
Komıssııa quramynda keminde bes adam bolýy kerek. Qujattardy alǵan soń jergilikti atqarýshy organ olardy bir jumys kúni ishinde komıssııaǵa joldaıdy. Suhbattasý bes jumys kúni ishinde ótkiziledi.
Suhbatty betpe-bet nemese qashyqtan ótýge bolady. Onyń ótkiziletin kúni, ýaqyty, formaty men orny týraly aqparat ótinish berýshiniń jeke kabınetinde kórsetiledi. Onlaın suhbattasý kezinde beınebaılanys arqyly jeke basyn anyqtaýǵa múmkindik beretin messendjerler men basqa da baılanys quraldary paıdalanylýy múmkin.
Suhbattasý qorytyndysy boıynsha komıssııa Qazaqstanda turaqty turýǵa ruqsat berý jáne qandas mártebesin alý jónindegi memlekettik qyzmetterdi odan ári alýǵa jol berý nemese bas tartý týraly usynym shyǵarady. Bul rette sheshim ashyq daýys berý arqyly qabyldanady. Komıssııa otyrysy músheleriniń keminde úshten ekisi qatysqan jaǵdaıda ǵana zańdy dep esepteledi.
Al vızalyq rejım qoldanylatyn memleketterdiń azamattary úshin tártip ózgeshe. Olar Qazaqstannyń sheteldegi mekemelerinde B8 jáne C1 sanatyndaǵy vızalardy rásimdeý kezinde suhbattasýdan ótedi.
Ózgerister qandas mártebesin berý tártibine de qatysty. Endi ótinish bergende qandastar men olardyń otbasy músheleri derbes derekterdi, onyń ishinde bank qupııasyna jatatyn málimetterdi, kredıttik bereshek somasyn, aı saıynǵy tólemder men merzimi ótken mindettemeler týraly aqparatty jınaýǵa jáne óńdeýge kelisim berýi qajet.
Sonymen qatar, qandas mártebesin joıýdyń jańa negizi engizildi. Eger qandas mártebesin alǵannan keıin úsh aıda Úkimet aıqyndaǵan qonystaný óńirlerinde turaqty turýǵa ruqsat alýǵa ótinish bermese, onyń qandas mártebesi joıylýy múmkin.
Tólem qabiletin rastaýǵa qatysty talap ta naqtylandy. Eger Qazaqstan azamattyǵyn alǵanǵa deıingi bes jylda bank shotynda turǵan qarajattyń bar ekeni rastalmasa, qandas mártebesi joıylýy múmkin.
Ózgerister turaqty turýǵa ruqsat alý úshin qajetti qujattar tizimine de engizildi. Atap aıtqanda, suranysqa ıe mamandyq ıelerine, eldiń ekonomıkalyq damýyna eleýli úles qosqan adamdarǵa, basym jobalarǵa qatysýshylar men ınvestorlarǵa qoıylatyn talaptar jeke kórsetilgen.
Aıta keteıik, Qazaqstan kóshi-qon júıesin eńbek naryǵynyń suranysyna beıimdep jatyr.
