Elde turaqty turýǵa múmkindik alatyn sheteldikter qatary keńeıýi múmkin
ASTANA. KAZINFORM — Elde shetel azamattaryna turaqty turýǵa ruqsat alý úshin suranysqa ıe mamandyqtar tizimin aıtarlyqtaı keńeıtý josparlanyp otyr, dep habarlaıdy Kazinform tilshisi.
Tıisti buıryq jobasyn QR Eńbek jáne halyqty áleýmettik qorǵaý mınıstrligi ázirledi.
— Jobada Qazaqstan Respýblıkasynda shetel azamattaryna turaqty turýǵa ruqsat alý úshin suranysqa ıe mamandyqtar tizimin el ekonomıkasynyń qajettilikteri men basym salalardy eskere otyryp, 51-den 174 mamandyqqa deıin keńeıtý kózdelgen, — delingen qujatta.
Tizimdi qalyptastyrý kezinde Qazaqstan ekonomıkasy men basym salalardyń qajettilikteri eskeriledi. Jobaǵa sáıkes, bul ózgerister Qazaqstanǵa biliktiligi joǵary sheteldik mamandardy tartýǵa qolaıly jaǵdaı jasaýǵa baǵyttalǵan.
Joba kóshi-qon saıasatyn jetildirý jáne Qazaqstannyń 2030 jylǵa deıingi kóshi-qon saıasaty tujyrymdamasyn iske asyrý aıasynda ázirlengen.
Qujat qabyldanǵan jaǵdaıda jańa talaptar Eńbek jáne halyqty áleýmettik qorǵaý mınıstriniń buıryǵy kúshine engennen keıin qoldanyla bastaıdy.
Qazaqstan azamattary buıryq jobasyn 6 qazanǵa deıin qoǵamdyq talqylaýǵa qatysa alady. Qujatpen osy jerden tanysýǵa bolady.
Buǵan deıin Qazaqstanda elge turaqty turý úshin kelgen sheteldikter men azamattyǵy joq adamdarmen áńgimelesý ótkizý tártibiniń ózgergeni habarlanǵan bolatyn.
