Qazaqstanda turaqty startap-ekojúıe qalyptasyp keledi
ASTANA. KAZINFORM — Qazaqstanda ınnovatsııalyq ınfraqurylym qarqyndy damyp keledi. Bul týraly Premer-mınıstrdiń orynbasary — Jasandy ıntellekt jáne tsıfrlyq damý mınıstri Jaslan Mádıev málimdedi.
Mınıstrdiń aıtýynsha, Astana Hub búginde elimizdiń 20 óńirinde ókildikterin ashty. Sonymen qatar qazaqstandyq startaptardy jahandyq naryqqa shyǵarý maqsatynda shetelde de keńeıý jumystary júrgizilip jatyr.
— Qazirgi ýaqytta AQSh-taǵy Kremnıı alqabynda, Saýd Arabııasynda, Ulybrıtanııada (London), Sıngapýrda jáne Qytaıda (Shanhaı) halyqaralyq ınnovatsııalyq habtar ashyldy, — dedi Jaslan Madıev.
Sonymen qatar ol óz sózinde 2 qazanda, digital bridge forýmynyń aıasynda «Álem AI» halyqaralyq jasandy ıntellekt ortalyǵynyń resmı ashylýy ótetinin atap ótti.
— Jańa ortalyq talanttar, ǵalymdar, kásipkerler men seriktesterdi biriktiretin biregeı alańǵa aınalady. Biz bul ekojúıeni mektep jasyndaǵy balalardan bastap iri halyqaralyq korporatsııalarǵa deıin qamtıtyn tutas tizbek retinde qarastyramyz. Bul — álemde teńdesi joq joba, — dedi Jaslan Mádıev.
Jalpy aýdany 22 myń sharshy metrdi quraıtyn ortalyq segiz qabattan turady. Munda qoǵamdyq keńistik, IT-bilim berý baǵdarlamalary, jasandy ıntellekt mektebi, sondaı-aq álemdik kompanııalardyń zerthanalary ornalasady.
Qazirdiń ózinde Google, Telegram, Adobe jáne birqatar jergilikti kompanııalarmen zerthanalar ashý týraly kelisimder jasalǵan. Al joǵarǵy qabatta memleket, bıznes jáne ǵylym ókilderi jasandy ıntellektini ekonomıka salalaryna engizý boıynsha birlesip jumys isteıtin bolady.
Buǵan deıin Astana IT-kompanııalardyń jańa ortalyǵyna aınalyp jatqanyn jazǵanbyz.