Qazaqstanda turaqtandyrý qorlaryn qalyptastyrýda 16 ÁKK-niń 13-i shyǵynǵa ushyrady
ASTANA. 13 tamyz. QazAqparat - Turaqtandyrý qorlaryn qurýdy júzege asyratyn áleýmettik-kásipkerlik korporatsııalar (ÁKK) shyǵynǵa ushyraýda. Bul týraly búgin ótken Úkimet otyrysynda Óńirlik damý mınıstriniń birinshi orynbasary Qaıyrbek Óskenbaev aıtty.
«Búgingi tańda turaqtandyrý qorlaryn qalyptastyrý boıynsha 16 áleýmettik-kásipkerlik korporatsııanyń 13-i shyǵynǵa ushyraǵan», - dedi Q. Óskenbaev baıandamasynda.
Onyń aıtýynsha, bul áleýmettik-kásipkerlik korporatsııalar shyǵyndardy belgilengen baǵa men naryq baǵasynyń arasynda bolatyn aıyrmashylyǵynan túsken paıdadan jáne bankte ornalastyrǵan depozıtten túsken aqshadan óteıtinine baılanysty.
«Naryq baǵasy ylǵı ózgerip turǵandyqtan, áleýmettik-kásipkerlik korporatsııalar taýardy naryq baǵasy belgilengen baǵadan tómen bolyp turǵan kezde jáne alǵan baǵasynan tómen satatyn kezderi jıi kezdesedi», - dedi ol.
Sonymen qatar, taýarlardy saqtaý jáne tasymaldaý kezindegi shyǵyndar taǵy bar. Áleýmettik-kásipkerlik korporatsııalarynyń qajetti sapaly ınfraqurylymdary, saqtaý oryndary, arnaıy avtokólikteri men saýda oryndary joq. Sóıtip, júzege asý mehanızmi jaǵynan jáne naryqtaǵy baǵany taldaý qıyndyǵynan biraz problemalar týyndaıdy.
«ÁKK-ler naryqtyq baǵanyń tómendeýine, azyq-túlikterdiń búlinýine, qosymsha qun salyǵyn jáne taǵy basqa shyǵyndardy tóleýge baılanysty týyndaıtyn shyǵyndardy kóbinese ózderi jabady», - dep qorytyndylady Q.Óskenbaev.
