Qazaqstanda tuńǵysh «Ulttyq óner» fakýlteti ashyldy
ASTANA. QazAqparat - Ultymyzdyń rýhanı qundylyqtaryn álemdik keńistikte dáripteý úshin elimizde tuńǵysh ret «Ulttyq óner» fakýlteti ashyldy, dep habarlaıdy QazAqparat.
Temirbek Júrgenov atyndaǵy qazaq ulttyq óner akademııasynda Elbasy N.Á.Nazarbaevtyń «Uly dalanyń jeti qyry» maqalasyndaǵy maqsat pen mindetterdi iske asyrý aıasynda, halqymyzdyń rýhanı qundylyqtary men tamyry tereńde jatqan ulttyq mádenıetimizdi órkendetý maqsatynda elimizde tuńǵysh ret «Ulttyq óner» fakýlteti ashyldy. Sharany óner akademııasynyń rektory Ashat Maemırov alǵy sózben ashty.
«Qadirmendi aǵaıyn, qurmetti qonaqtar! Búgingi sharany bizdiń ulanǵaıyr memleketimizdiń mádenı keńistiginde, rýhanı ómirindegi erekshe bir eleýli oqıǵa dep oılaımyn! Elbasy N.Nazarbaevtyń «Uly dalanyń jeti qyry» maqalasynda ult óneri men mádenıet joldaryn ulyqtaýdyń búkil mehanızmderi kórsetilgen. Sol kóterilgen maqsat mindetterdi júzege asyrý úshin osy fakýltetti ashý qajettiligi týyndady», - dedi rektor.
Sharaǵa Qazaqtsannyń Halyq artısi Sara Tynyshtyǵulova, Qazaqstannyń eńbek sińirgen qaıratkeri, T.Júrgenov atyndaǵy Qazaq ulttyq óner akademııasynyń professory Pernebek Momynov, Qurmanǵazy orkestriniń dırektory Nurǵısa Daýeshov, Otyrar sazy orkestriniń kórkemdik jetekshisi Dinzýhra Tilendıeva jáne Ulttyq joǵary oqý oryndarynyń rektorlary qatysty.
Qazaqstannyń eńbek sińirgen qaıratkeri, T.Júrgenov atyndaǵy qazaq ulttyq óner akademııasynyń professory Pernebek Momynov óz sózinde: «Jańadan ashylyp jatqan bul «Ulttyq óner» fakýlteti el mádenıeti úshin aıtýly oqıǵa. Jastar jylynda jastarǵa jol ashyp jatqandaryńyzǵa dán rızamyn. Bul qazaq ónerin búkil álemge pash etýge, úlken múmkindik!» - dep, júrekjardy lebizin bildirdi.
Shara barysynda qazaqtyń halyq ánderi men dástúrli ánderin keńinen nasıhattap júrgen ánshi, Qazaqstannyń eńbek sińirgen ártisi, «Dástúrli mýzykalyq óner» kafedrasynyń meńgerýshisi Ramazan Stamǵazıev Aqan seriniń ózi qoldanǵan dombyrasyn qolǵa alyp avtordyń repertýaryndaǵy ánderin shyrqady.
