Qazaqstanda tuńǵysh ret jol tóseminiń sý-jylý rejımin udaıy ólshep otyratyn eseptegishter qoldanyla bastady
ASTANA. Qazannyń 18-i. QazAqparat - 2010 jylǵy qazannyń 18-inde «QazjolǴZI» aktsıonerlik qoǵamynyń mamandary Astana-Býrabaı avtomagıstraliniń 7-shi kılometrinde Qazaqstanda túńǵysh ret joldyń topyraq tóseminiń jáne jol jamylǵysynyń temperatýrasy men ylǵaldyǵyn ólshep otyratyn arnaıy eseptegishter ornata bastady, dep habarlaıdy QR Kólik jáne kommýnıkatsııa mınıstrliginiń baspasóz qyzmeti.
Bul eseptegishter basqa elderde paıdalanylyp júrgen qurylǵylardan góri jetildirilgen. Ólsheýler táýlik saıynǵy jáne jyl boıǵy tsıklde júrgizilip otyrady. Ólsheýler nátıjeleri jol qurylymynyń sý-jylý rejıminiń sıpattamasyn alýǵa jáne jol qurylymyn esepteý tásilderin jetildirý barysynda eskerýge múmkindik beredi.
Buǵan deıin osyǵan uqsas, biraq bul deńgeıde jetildirilmegen eseptegishter AQSh, Japonııa, Ýkraınanyń Kıev, Reseı Federatsııasynyń Lenıngrad jáne Máskeý oblystarynyń jol ýchaskelerindegi topyraq tósemderine ornatylǵan bolatyn. Ondaǵy baqylaýlar nátıjeleri topyraqtyń esepti sıpattamalaryn jáne sol óńirlerdegi sý-jylý rejımin retteý sharalaryn dálirek belgileýge múmkindik berdi. Qazaqstanda mundaı jumystar tuńǵysh ret qolǵa alynýda. Osy ólsheýlerdiń nátıjeleri joldy paıdalaný barysyndaǵy jol qurylymynyń ýaqyt ótken saıynǵy ózgeristeriniń naqty jaı-kúıin jáne olardyń paıdalanylý merzimin anyqtaýǵa múmkindik ashady.
Keleshekte mundaı eseptegishter respýblıkanyń túrli tabıǵı-klımattyq jaǵdaıdaǵy basqa joldaryna da ornatylatyn bolady.
Jol qurylymdarynyń jumys jaǵdaıyn zertteý maqsatynda osyndaı eseptegishterdi ornatý jónindegi sheshim Qazaqstan Respýblıkasy Kólik jáne kommýnıkatsııa mınıstrliginde avtomobıl joldaryn paıdalaný máselelerin talqylaý nátıjesinde qabyldandy.
Anyqtamalyq: Avtomobıl joldarynyń myqtylyǵy men uzaq merzimge saqtalýy negizinen jol jamylǵysy men topyraq tósemine baılanysty. Olarǵa qozǵalys jaǵdaıy men tabıǵı-klımattyq jaǵdaılar áser etedi. Sol sebepti birdeı materıaldar men qurylǵylardyń respýblıkanyń ár óńirindegi qyzmeti árqıly bolady. Osyǵan baılanysty qazir mynadaı mindetterdi sheshý qajet:
- jol qurylǵylary men materıaldardyń ártúrli jaǵdaıdaǵy qyzmet erekshelikterin zertteý;
- jol qurylǵylaryn qazirgi paıdalaný jaǵdaıyna sáıkes jobalaý;
- jańa materıaldar men tehnologııalardy zerthana jaǵdaıynda jáne jolda olardyń Qazaqstanda paıdalaný tıimdiligin anyqtaý úshin tekserip kórý.
Osy maqsatpen keıingi bes jylda topyraqty, geosıntetıkalyq jáne jylý saqtaǵysh materıaldar paıdalanylǵan asfalt-betonnyń jańa quramdary 30-ǵa tarta tájirıbelik ýchaskelerge tóseldi. Barlyq synaq ýchaskelerinde turaqty monıtorıng júrgizilip otyrady. Olardyń nátıjeleri avtomobıl joldaryn salǵanda jáne jóndegende barynsha tehnıkalyq jáne ekonomıkalyq jaǵynan tıimdi sheshimderdi naqty paıdalaný úshin usynylýda. Bul óz aldyna joldardyń uzaqqa shydas beretin tózimdiligin arttyrýǵa jáne avtomobıl joldaryna jumsalatyn bıýdjettik qarajatty tıimdi paıdalanýǵa múmkindik ashady.
