Qazaqstanda tuńǵysh ret muraǵatshylar týraly jınaq jaryq kórdi
Oǵan muraǵat isiniń ardagerleri, respýblıkadaǵy memlekettik muraǵattardyń basshylary men qyzmetkerleri, sondaı-aq joǵary oqý oryndarynyń oqytýshylary men stýdentteri qatysty.
Tusaýkeser rásimi aıasynda uıymdastyrylǵan dóńgelek ústelde QR Prezıdenti Muraǵatynyń dırektory Borıs Japarov mundaı jınaqtyń tuńǵysh ret jaryq kórip otyrǵandyǵyn aıtty. «Muraǵatshylar ádette ǵylym, mádenıet, óner, ónerkásip, BAQ jáne basqa da salalardaǵy mamandyq ókilderi týraly kitaptar daıyndaýǵa kómektesedi. Endi minekı, alǵash ret ózderi jaıynda: Qazaqstandaǵy memlekettik muraǵattardyń ókilderi, muraǵatshy-áriptester týraly jınaqty jarııalap otyr. Onda Qazaqstan muraǵatshylarynyń maqalalary, ómirbaıandary, estelikteri, suhbattary usynylǵan. Jınaqtan memlekettiń belgili bir saıası tarıhı kezeńderiniń muraǵatshylardyń ómiri men qyzmetine qanshalyqty áser etkendigin kórýge bolady», - dedi ol.
Sonymen qatar, Borıs Álikenuly jınaqtyń budan ári jalǵastyrylatyndyǵyn, bul úshin áli de kóptegen belgili muraǵatshylar týraly materıaldar jınastyrý qajettigin jetkizdi. Óıtkeni, ýaqyt óte kele bul málimetter muraǵat salasyn zertteýde qundy derekterge aınalatyn bolady.
Óz kezeginde QR Prezıdenti Muraǵaty dırektorynyń orynbasary Vıacheslav Chýprov sonaý 1998 jyly 22 jeltoqsanda qabyldanǵan Qazaqstan Respýblıkasynyń «Ulttyq arhıv qory men arhıvter týraly» Zańyn ázirleýde qandaı qajyrly jumystar atqarylǵanyn aıtty.
«Qazaqstan táýelsizdigin alǵan soń, elde muraǵat qujattaryn qalyptastyrý, saqtaý jáne paıdalaný salasyndaǵy qoǵamdyq qatynastardy retteıtin zań qajet boldy. Osy maqsatpen, 1992 jyldyń mamyrynda QR Mınıstrler Kabıneti janyndaǵy Bas Muraǵat basqarmasynyń alqasynda muraǵattyq zańnyń jobasyn jasaý týraly sheshim qabyldandy. Sóıtip, aldyńǵy qatarly mamandardan jumys toby qurylyp, oǵan jobany daıyndaý júkteldi. Men osy jumys tobyna basshylyq ettim. Kóp usynystar, talqylaýlar boldy, shet elderdiń tájirıbeleri zertteldi. Sóıtip, 1998 jyly 22 jeltoqsanda zań qabyldandy», - dedi V. Chýprov.
Aıta ketelik, qurastyrýshylar bul basylymda birinshi kezekte Qazaqstandaǵy muraǵat salasynyń paıda bolǵan kezi ótken ǵasyrdyń 20-shy jyldarynan bastap, 90-shy jyldarǵa deıingi basshylary jaıynda jan-jaqty habardar etýge tyrysqan.
