Qazaqstanda tuńǵysh ret múmkindigi shekteýli jandardy qashyqtyqtan oqytý ortalyǵy quryldy
ALMATY. 14 qańtar. QazAqparat /Ádilet Musahaev/ - Búgin Almatydaǵy «Turan» ýnıversıtetinde múmkindigi shekteýli jandardy qashyqtyqtan oqytý ortalyǵynyń tusaýkeseri boldy.
Atalmysh joǵary oqý orynnyń rektory, ekonomıka ǵylymdarynyń doktory, professor Rahman Alshanovtyń aıtýynsha, Qazaqstanda 1 mln. 100 myń adam memleketten múgedektik járdemaqy alsa, jumys istep júrgenderdiń 11 myńy osy qatarda eken.
Sonymen qatar ol dúnıejúzinde bilim ala almaı, qoǵam ómirine belsene aralasa almaı júrgen erekshe muqtaj jandarǵa aqparattyq tehnologııa arqyly bilim berý, qosymsha bilim berýine jaǵdaı jasaýda úlken tájirıbe bar ekendigin alǵa tartady. «Múgedekterdiń ishinde «Novel» syılyǵynyń ıegeri bolǵan jandar bar. Brıtanııa men Germanııada mınıstr bop qyzmet atqaryp júrgenderi de kezdesedi. Qarap otyrsaq, kóptegen múgedek jandar óz múmkindikterin júzege asyra almaı jatyr, osy turǵyda ýnıversıtetimizde aqparattyq tehnologııa damyp kele jatyr, qazir qashyqtyqtan oqytýǵa lıtsenzııa aldyq. Keshe ǵana kózi kórmeıtin qabileti joǵary bir aspırantym kandıdattyq dısertatsııa qorǵady. Alaıda mundaı jandardyń bilim alýyna kóptegen kedergiler men shekteýler bar, osy turǵyda qashyqtyqtan oqytý olardyń úıinen shyqpaı-aq bilim alýyna jol ashady», -deıdi R.Alshanov.
Aqparattyq jáne telekommýnıkatsııalyq tehnologııalardyń mańyzdylyǵy onyń qolaıly ýaqytta, kez kelgen orynda jeke keste boıynsha úıden shyqpaı bilim alýǵa bolatyndyǵy.
Atalǵan ortalyq qyzmetinde UBT men keshendi testileýge daıarlaý, biliktilikti kóterý jáne mamandardy qaıta daıarlaý, joǵary oqý ornynan keıingi daıarlyq jáne joǵary bilim syndy negizgi baǵyttar jumys isteıdi.
