Qazaqstanda tuńǵysh ret MMA-dan Azııa chempıonaty ótedi
NUR-SULTAN. QazAqparat – Qazaqstannyń MMA jáne Aralas jekpe-jeginiń birlesken federatsııalarynyń uıymdastyrýymen elordada IMMAF aralas jekpe-jek óneriniń halyqaralyq federatsııasynyń dırektorlar keńesiniń otyrysy bolyp ótti, dep habarlaıdy QazAqparat tilshisi.
Baspasóz máslıhatynda konfederatsııanyń mindeti, MMA jekpe-jegin Ortalyq Azııa men Ázerbaıjan elderinde damytý máseleleri, sonymen qatar MMA boıynsha Azııa chempıonatyn ótkizý jospary talqylandy. Osylaısha, MMA-dan elordada Azııa chempıonatyn 2020 jyldyń maýsym aıynda ótkizý josparlanyp otyr.
IMMAF prezıdenti Kerıt Braýn Qazaqstannyń MMA federatsııasy halyqaralyq týrnırlerdi uıymdastyrýǵa belsendi atsalysyp júrgenin atap ótip, IMMAF ókilderi elordada zor qurmetpen kútip alǵany úshin alǵysyn bildirdi.
Al qazaqstandyq sportshylardyń múmkindikterin IMMAF-tyń Azııa aımaǵy boıynsha dırektor Vısam Abı Nader erekshe atap ótti.
«Qazaq atletteri, olardyń tártibi men fızıkalyq daıyndyǵy árdaıym qurmetke laıyq. Mundaǵy sportshylar shynynda da, IMMAF-tyń ózge ókilderi úshin shynaıy úlgi bola alady», - dedi ol.
Otyrystyń qortyndysynda MMA Ortalyq Azııa konfederatsııasyn ashý qurý týraly jáne Qazaqstan Respýblıkasynda 2020 jyly MMA-dan Azııa chempıonatyn ótkizý jaıly sheshim qabyldandy.
