Qazaqstanda tuńǵysh ret «QR memlekettik hattamasy» atty kitap basylyp shyqty
ASTANA. Qyrkúıektiń 16-sy. QazAqparat /Jasulan Amanbaıuly/ - Búgin Astanadaǵy Qazaq Gýmanıtarlyq-Zań ýnıversıtetinde QR Prezıdenti Hattamasynyń burynǵy bastyǵy,
«Bolashaq» stıpendıattary qaýymdastyǵy keńesiniń tóraǵasy Baýyrjan Baıbektiń «Qazaqstan Respýblıkasynyń memlekettik hattamasy» atty kitabynyń tanystyrylymy boldy.
Bul týyndy halyqaralyq qatynastar jáne zań fakýltetiniń stýdentteri úshin taptyrmas oqýlyq bolary sózsiz. Sebebi, avtor B. Baıbektiń aıtýynsha, bul kitap memlekettik hattama arqyly eldiń tarıhı jolyn saraptaý, táýelsizdik kezeńin taldaýdyń alǵashqy júıeli tájirıbesi bolyp tabylady. Sonymen qatar kitapta teorııalyq materıaldar, halyqaralyq elderdiń tájirıbesi, kelissózder úderisi, normatıvtik-quqyqtyq baza, memlekettik hattama boıynsha reglamentteletin jaıttar, iskerlik qatynastar jáne ádep jóninde keń aýqymdy aqparat jınaqtalǵan.
«Qazaqstan Respýblıkasynyń memlekettik hattamasy» atty kitap arqyly elimizdiń táýelsizdik jyldarynda júrip ótken jolyn taldaýǵa, memlekettik hattama týraly, dıplomatııalyq hattama men ádep jóninde tolyqqandy teorııalyq materıal berýge talpynys jasadyq», deıdi ol.
«QR Prezıdenti Hattamasyn tórt jyl basqardym. Barlyq tájirıbemdi osy shyǵarmaǵa túsirýge tyrystym. Sondyqtan atalǵan kitap Qazaqstandaǵy hattama tájirıbesin tolyq kórsetedi», dep atap kórsetti B. Baıbek.
Avtordyń atap kórsetkenindeı, «memlekettik hattama eldiń eń basty atrıbýttarynyń biri. Úlken sharalardyń joǵary deńgeıde ótkizilýi táýelsiz respýblıkamyzdyń jáne onyń hattama isiniń kemeldengenin kórsetedi». Sońǵy 5 jyldyń ózinde Qazaqstan Prezıdenti 90 ret shet elderge saparǵa shyǵyp, 80 ret el aımaqtaryn aralaǵan. Elimizge sheteldik memleketterdiń 50 basshysy kelgen.
Memlekettik hattama - memlekettiń basqa eldermen qarym-qatynasyndaǵy normalar men zańdardy qamtıdy. Qazaqstan Respýblıkasynyń hattamasy barlyq halyqaralyq standarttarǵa saı keletin ámbebap qujat bolyp tabylady.
