Qazaqstanda tuńǵysh ret «Koncherto Barokko» baletiniń premerasy bolady
NUR-SULTAN. QazAqparat – 4-5 qazanda «Astana balet» teatrynyń sahnasynda Djordj Balanchınniń «Koncherto Barokko» spektakliniń premerasy ótedi, dep habarlaıdy QazAqparat.
Djordj Balanchınniń bir aktili baletin qoıǵan, maestronyń shákirti – frantsýz horeografy Nanett Glýshak.
1941 jyly shyǵarylǵan balet, osy kúnge deıin álemniń jetekshi teatrlarynyń repertýarynan oryn alyp keledi. «Koncherto Barokkoda» ne sıýjet, ne keıipker joq, tak fızıkalyq kúıge túsken mýzyka ǵana. Spektakl kostıýmderi men dekoratsııalar qarapaıym – Balanchın sánge aınaldyrǵan mınımalızm áli de saltanat quryp keledi.
Premeraǵa daıyndyqqa eki apta ǵana bólinip otyr – qysqa merzim bolǵanymen, qoıýshy-horeograf ártisterdiń alǵa qoıǵan maqsatyna jetetinine senimdi. «Eń bastysy – olar jańalyqqa qushtar, sheberligin ushtaı túsýge asyq» - deıdi Nanett Glýshak.
«Astana balet» teatrynyń ártisteri amerıkalyq neoklassıkany budan buryn da bılegen: eki jyl buryn astanamyzda áıgili «Serenada» baletiniń premerasy ótken. Ol kezde bizdiń ujym Orta Azııada Djordj Balanchın qorymen birlese otyryp, horeograf stıliniń standarttary men tehnıkasy sáıkes spektakl qoıǵan alǵashqy teatr edi. Nanett Glýshak birneshe jyl buryn Qazaqstanǵa kelip, ártisterge sheberlik dáristerin ótkizgenin, sóıtip, jańa, ǵajaıyp teatrmen tanysqanyn eske alady.
«Osy kúni balet trýppasy edáýir ósken, biliktiligi artyp, kemeldene tústi, bul ǵajap qoı», – deıdi horeograf.
Premera kezindegi ártister quramy áli jasyryn saqtalyp keledi. Teatr ónerinde mundaı tájirıbe bary ras – qarymdy shyǵarmashylyq báseke úshin osyndaı qadamǵa barady. Alaıda, bul qoıylymǵa teatrdyń jetekshi solısteri qatysady. Olar, Tatıana Ten, Farhat Bórıev, Darına Qaırasheva, Aınur Ábilǵazına, Nazerke Aımuhametova, Súndet Sultanov jáne ózgeleri. Qoıýshy-dırıjer – Arman Orazǵalıev.
Premera «Amerıkalyq balet keshi» atty jańa baǵdarlamanyń aıasynda kórsetilmek. Astana turǵyndary men qonaqtaryna jańa spektaklden bólek, kórermen kózaıymyna aınalǵan Djordj Balanchınniń «Serenadasy» men Nıkolo Fonteniń «Mahabbattyń ǵaıyp bolǵan darabozdary» da tartý etiledi.
Spektaklderdiń bastalýy: 4-qazan, saǵat 19:30, 5-qazan, saǵat 18:00.
