Qazaqstanda tuńǵysh ret konkımen júgirý sportynan kásibı komanda qurylady
ASTANA. QazAqparat - Qazaqstanda tuńǵysh ret konkımen júgirý sportynan kásibı komanda qurylmaq. Astanada Qazaqstan men Nıderland ókilderi memorandýmǵa qol qoıdy, dep habarlaıdy kazsporttv.kz.
«Astana» velokomandasynyń úlgisi boıynsha júzege asyrylatyn jobany eki tarap teń dárejede qarjylandyrmaq. Qarjylyq ınvestıtsııadan bólek, gollandııalyqtar jobaǵa sporttyq medıtsına, jattyqtyrýshylar men menedjment mamandaryn daıarlaý salasyndaǵy bilimderin engizbek. Sonymen qatar, memorandým boıynsha taraptar aldaǵy ýaqytta elimizdegi konkımen júgirý sportyn damytý baǵdarlamasynda birlese jumys isteıdi. Onyń ishinde, sporttyq ınfraqurylymdy damytý baǵdarlamasy da josparlanady. Jańa komandanyń negizgi maqsaty - qazaqstandyq sportshylardy 2018 jáne 2022 jyldary ótetin Olımpıada oıyndary men Álem chempıonatyna daıyndaý. Birinshi kezekte 2015 jyly «Alaý» muzaıdynynda ótetin sprınttik jarystan Álem chempıonatynda úzdik nátıje kórsetý. Joba resmı túrde 2014 jyldyń 26 mamyrynda bastalady. Áriptestik 2022 jylǵa deıin sozylady. Qazaqstandyq taraptan Sport jáne dene shynyqtyrý isteri agenttigi men Ulttyq konkımen júgirýshiler federatsııasy, al Nıderland tarapynan 4SKATING komandasy qatysady. Bul komandaǵa 1988 jylǵy úsh dúrkin Olımpıada chempıony Ivonn van Gennıp pen 1992 jylǵy Olımpıada chempıony Bart Veldkamp jetekshilik etedi.
