Qazaqstanda tuńǵysh ret baýyrdy almastyrý otasy jasalǵan patsıenttiń hali turaqty - S. Qaıyrbekova
ASTANA. 12 jeltoqsan. QazAqparat /Jasulan Amanbaıuly/ - Qazaqstanda tuńǵysh ret baýyrdy almastyrý otasy jasalǵan patsıenttiń hali turaqty. Bul týraly búgin Densaýlyq saqtaý mınıstrliginiń selektorlyq keńesinde vedomstvo basshysy Salıdat Qaıyrbekova málim etti.
Ota A. Syzǵanov atyndaǵy ınstıtýttyń bazasynda jasaldy. Mamandarmen selektorlyq keńes barysynda sóıleskende, ınstıtýt dárigerleri baýyrdy transplatatsııalaýdyń eń kúrdeli ári aýyr túri bolyp tabylatynyn atap ótti. Baýyrdyń oń jaq bóligi 38 jastaǵy úlken ápkesinen 33 jasar sińlisine aýystyrylǵan.
«Qazirgi kezde ota jasalǵan patsıentterdiń jaǵdaıy turaqty dep baǵalanýda», - dep atap ótti vedomstvo basshysy.
Budan buryn habarlaǵanymyzdaı, baýyrdy aýystyrý operatsııasy bıyl 9 jeltoqsanda A.N.Syzǵanov atyndaǵy ulttyq ǵylymı hırýrgııa ortalyǵynda Belarýs mamandarynyń kómegimen jasalǵan bolatyn. Selektorda belgili bolǵanyndaı, ota 12 saǵatqa jalǵasqan.
S. Qaıyrbekova beınekonferentsııa arqyly ótken selektorlyq jıynda belarýstyq hırýrgtarǵa alǵys bildirip, olarǵa «Qazaqstan medıtsınasynyń damýyna qosqan úlesi úshin» tósbelgilerin taǵaıyndaǵandyǵyn málim etti.
Qazirgi tańda, mınıstrliktiń derekteri boıynsha, Qazaqstanda aǵza múshelerin aýystyrý úshin adamdar shetel klınıkalaryna barýǵa májbúr bolyp keledi. Al onda bir adamǵa ota jasaý úshin memlekettik bıýdjetten 200-300 myń eýro ketedi eken.
